Presidenti amerikan, Donald Trump dhe deklaratat e pamenduara mirë, janë dy gjëra që lidhen shpeshherë me njëra-tjetrën. Kreu i Shtëpisë së Bardhë nxiti qytetarët e shtetit të Karolinës së Veriut që të votojnë dy herë në zgjedhjet presidenciale të nëntorit, edhe pse kjo është e paligjshme.
Sipas tij, kjo është mënyra e vetme që të sigurohen që vota e tyre të numërohet. Trump sugjeroi që zgjedhësit të votojnë një herë fizikisht dhe një tjetër herë më anë të postës, duke testuar kështu sistemin. Presidenti amerikan vazhdimisht ka bërë pretendime false se votimi me postë nuk është i sigurt dhe do të çojë në manipulim të rezultatit të zgjedhjeve.
“Le t’i dërgojnë me postë dhe më pas le të shkojnë të votojnë. Dhe nëse sistemi është kaq i mirë sa pretendojnë, atëherë padyshim që qytetarët nuk do të jenë në gjendje që të votojnë personalisht”, tha Trump.
Menjëherë pas deklaratës së Trump, prokurori i përgjithshëm i Karolinës së Veriut, Josh Stein, tha se presidenti po nxit qytetarët që të shkelin ligjin duke krijuar kaos në zgjedhje. “Sigurohuni që të votoni, por jo dy herë”, shkruan ai në profilin e tij në rrjetin social Twitter. Ndërkohë, demokratët kanë akuzuar shpeshherë Trump dhe Partinë Republikane për tentativa të ndryshme për të ndikuar votën e amerikanëve për të fituar zgjedhjet presidenciale.
