Hetimet për një ngarkesë prej 650 kg kokainë të gjetur brenda një kontejneri me kafe në portin e Livornos ka bërë që autoritetet italiane të zbulojnë aktivitetin e një organizate të specializuar në trafikun ndërkombëtar të drogës, e cila drejtohej nga Salvatore Casamonica, anëtari i familjes së njohur mafioze nga Roma dhe shqiptari Dorian Petoku.
Ky i fundit u arrestua në Tiranë nga policia shqiptare në bashkëpunim me Guardia di Finanza dhe do të ekstradohet në Itali së shpejti, ku do të përballet me akuzat për trafik ndërkombëtar droge.
Por si funksiononte rrjeti i ndërtuar nga Casamonica dhe Petoku?
Mediat italiane sqarojnë deri në detaje aktivitetin e organizatës mafioze, duke raportuar se grupi ku luante rol drejtuesi 31-vjeçari shqiptar, organizonte dhe financonte blerjen e sasive të mëdha të drogës, të destinuara për të “ushqyer” sheshet romake dhe napolitane.
Salvatore Casamonica ka luajtur një rol udhëheqës me ndihmën e “ushtarit” të tij Silvano Mandolesi, duke krijuar kontaktet me trafikantët e drogës në Amerikën e Jugut, me të cilët ka pasur marrëveshje për importimin në Itali të gjithë prodhimit vjetor të kokainës së tyre, që vlerësohet në rreth 7 ton, raporton gazeta Shqip.
Në të njëjtën kohë, Petoku raportohet të ketë pasur lidhje me trafikantët e drogës brazilian, prej të cilëve kishte siguruar sasi shtesë të kokainës, teksa ai mbështetej nga miku i tij malazez Tomislav Pavloviç, i cili shkoi në disa raste në Brazil, në qytetin e Sao Paulos, për të siguruar logjistikën e trafikut.
Malazezi nën urdhrat e Petokut punoi me ndihmën e grupeve kriminale lokale duke u ofruar ryshfet zyrtarëve doganorë në detyrë në aeroportin e metropolit brazilian, në mënyrë që të shmangeshin të gjitha kontrollet për trafikun e kokainës.
Ndërkohë, transporti i ngarkesave të drogës do të bëhej duke përdorur një avion privat, ku në çdo udhëtim do të transportohej rreth 1 ton drogë.
Në shumicën e rasteve Salavatore Casamonica i dërgonte mesazhet në Amerikën e Jugut nëpërmjet bashkëpunëtorëve të tjerë, për të shmangur kontaktin e drejtpërdrejtë ndërmjet si dhe për të minimizuar rrezikun e kapjes nga policia.
Goditja e këtij grupi u bë nëpërmjet infiltrimit të një agjenti të fshehtë, i cili arriti të krijojë kontakt me Casamonican, të fitojë besimin e tij dhe të ndikojë në detyrat delikate të bandës, si rekrutimi pilotëve dhe gjetjen e avionit me të cilin do të transportohej droga.
Mediat italiane theksojnë se në këtë operacion ka bashkëpunuar edhe DEA amerikane, e cila ka vënë në dispozicion të agjentit italian një avion.
Agjenti i infiltruar kishte zbuluar se grupi në momentin e fundit ndryshoi planin kriminal, duke vendosur aeroportin në qytetin zviceran të Sionit si bazën për shkarkimin në Evropë të drogës.
Kokaina që do transportonte ky grup është tashmë në dispozicion në Amerikën e Jugut, dhe vlerësohet te jetë rreth 500, apo 1000 kg, që mund të kapë vlerën e 4,5 milionë eurove.
