Udhëheqësit politik shqiptarë drejtuan mesazhe ngushëllimi dhe mbështetjeje ndaj Austrisë pas sulmit terrorist që tronditi Vjenën mbrëmjen e së hënës.
Presidenti Ilir Meta e cilësoi “lajm të tmerrshëm” sulmi në kryeqytetin austriak. Ai u përcolli ngushëllime familjeve të viktimave dhe theksoi se Shqipëria i qëndronte krah Austrisë.
“Qëndrojmë me vendosmëri krah Austrisë dhe partnerëve tanë ndërkombëtar në luftën kundër terrorizmit,” – shkroi Presidenti në Twitter.
Kryeministri Edi Rama u shpreh i pikëlluar nga sulmi terrorist në Vjenë, që sipas tij tronditi “zemrën e Evropës”.
“Lutjet dhe mendimet tona janë për viktimat dhe familjet e tyre. Vlerat tona të përbashkëta do qëndrojnë gjithmonë fort më shumë se çdo dhunë ekstremizmi. I qëndrojmë me vendosmëri krah Austrisë,” – shkroi në Twitter Rama.
Kryetari i Partisë Demokratike, Lulzim Basha, “e dënoi ashpër sulmin” ndaj “jetëve të pafajshme në Vjenë”.
“Mendimet dhe lutjet e mia janë me familjet e viktimave. Shqipëria qëndron fort në solidaritet me popullin dhe autoritetet austriake,” – u shpreh Basha në Twitter.
Kryetari i Kuvendit, Gramoz Ruçi përcolli gjithashtu mesazh për sulmin terrorist. Ruçi tha se cilatdo qofshin motivet e këtij sulmi, “ato tregojnë se qytetërimi është ende i kërcënuar nga barbaria” dhe se “përpjekjet e njerëzimit për tolerancë, paqe dhe siguri vazhdojnë të sfidohen nga impulset e errëta”.
