Europës së vjetër po i lehtësohen plagët e shkaktuar nga koronavirusi dhe kjo gjë po shihet në raportimet që vijnë nga vendet më të goditura nga pandemia si Spanja dhe Franca.
Ministria e Shëndetësisë në Francë raportoi se në 24 orët e fundit u raportuan 96 viktima, duke e çuar totalin në 27,625. Ulje të ndjeshme pësoi dhe numri i personave të shtruar në spitale dhe ai i atyre të shtruar në terapinë intensive.
Edhe Spanja raportoi shifra të përmirësuar nga 24 orët e fundit, por pavarësisht kësaj kryeministri Sanchez po mendon që të shtyjë më tej gjendjen e emergjencës në vend.
Sipas autoriteteve zyrtare, në Spanjë të shtunën u raportuan 102 viktima të tjera nga koronavirusi, shifër kjo më e ulët që prej 8 javësh.
Po ashtu edhe Italia raportoi më herët numrin më të ulët të viktimave nga koronavirusi që nga muaji mars.
Emergjencat Civile raportuan se në 24 orët e fundit në shtetin fqinj kanë humbur betejën me Covid-19, 153 persona, shifra më e ulët kjo e regjistruar në dy muajt e fundit. Përmirësim i ndjeshëm u regjistrua dhe në Lombardi ku ditën e fundit pati vetëm 39 viktima.
