Kryeministri Edi Rama ndodhet në panairin e verërave në Bardolino, Itali, ku zhvilloi takim trepalësh me presidentin serb Aleksandër Vuçiç dhe kryeministrin e Maqedonisë së Veriut, Dimitar Kovaçevski.
Ndërsa foli për rritjen e shkëmbimit tregtar mes tre vendeve falë “Open Balkan”, Rama shtoi se Kosova është një pikë mosmarrëveshjeje me Serbinë.
“Ndonjëherë ka mosmarrëveshje vërtet të mëdha mes nesh, sidomos kur bëhet fjalë për Kosovën dhe kjo është arsyeja për të folur më shumë. Dialogu është gjëja më e rëndësishme”, u shpreh ai.
Teksa fliste për Kosovën, Rama u shpreh se nga takimi me kryeministrin Albin Kurti, kuptoi se ky i fundit ishte më konstruktiv se herët e tjera.
“Nëse do të vazhdonim të mos i flisnim njëri-tjetrit e të qëndronim në barrikadat e së shkuarës, sot mund të kishim qenë në një pozicion shumë të keq me të gjitha krizat që janë shpalosur vetëm në kufijtë e Evropës. Natyrisht kemi një mosmarrëveshje të madhe apo një distancë mjaft e madhe kur bëhet fjalë për atë që ju e quani Kosova e Metohia dhe unë e quaj Kosova. Kjo është arsye për të folur më shumë. Jam takuar me Kurtin para pak ditësh dhe është më i hapur e konstruktiv se më parë. I thashë dhe e përsëris se duhet të nxisim e të sigurohemi se si Asociacioni dhe aspekti fetar i dialogut garantohen 100% për qytetarët serb në Kosovë që janë pakicë dhe duhen parë si urë e së ardhmes, jo problem mes të gjithëve ne në të ardhmen”, ka thënë Rama.
Nga ana tjetër presidenti serb tha se marrëdhëniet Kosovë-Serbi mund të normalizohen pa u përfshirë në këtë mes pjesa agresive, ndërsa shtoi se bashkë me kryeministrin Rama do bëjë çmos për të shmangur një konflikt.
“Unë nuk qortoj Edin, se ai nuk e bën këtë me mua. Ekonomia është themeli real. Jam krenar që shqiptarët ndihen të sigurt, të siguruar dhe mjaft të mirëpritur. Është e njëjta gjë kur serbët ikin në Shqipëri. Po mirë, çfarë do bëjmë? Të zihemi, të bëjmë një Ukrainë tjetër apo çfarë? Shoh se ka shumë njerëz që presin të shohin një përplasje të madhe? Çfarë kërkoni nga ne? Do bëj maksimumin tim për ta shmangur, edhe Edi po bën të njëjtën gjë. Është e lehtë të flasësh, ne i dimë dallimet tona dhe jetojmë me to. Besoj në miqësinë e ardhshme në qytetarët shqiptarë dhe serbë,” – u shpreh Vuçiç.
