Çështja “Xibraka” rikthen sërish përplasjet mes kryeministrit Edi Rama dhe kreut të grupit të PD Gazment Bardhi.
Teksa Bardhi pretendon se ka ngritur padi ndaj Olsi Ramës duke e akuzuar si të përfshirë në ngjarjen e laboratorit të drogës, kreu i qeverisë ka publikuar një vendim të SPAK.
Në vendim thuhet se “përgjatë vitit 2024, nuk ka pasur asnjë kallëzim të kryer nga Gazment Bardhi”.
Rama shkruan se nuk ka pasur asnjë kallëzim nga Bardhi, ndërsa tashmë shpreson që SPAK ta çojë deri në fund këtë çështje.
“A ju kujtohet kur thoshte “kallzim more kallzim kam bërë” duke tundur ndenjësen mbi karrige?! Kishte zbuluar një narkotrafikant në familjen time, që e kishte kallzuar në SPAK dhe aq shumë e bëri ajrin vrimë me gisht sa e detyroi narkosin e kallzuar, t’i bënte kallzim për kallzim të rremë. Mirëpo ja që s’paska qenë kallzim i rremë sepse s’paska qenë fare hiç kallzim, po një tjetër kërcim i çingijes në prehërin e tutorit të ri lart në ballkon. Orë të tëra në parlament, intervista të tëra nëpër kanale, tituj e fjali të tëra nëpër portale, pa asnjë turp e asnjë respekt për miletin që e kanë bërë si mish në pazarin e neveritshëm të kujeve e kuisjeve të tyre, dhe si përfundim një tallje e madhe për një kallzim që nuk ekziston! Fatmirësisht SPAK-u megjithatë e ka rihapur dosjen e tundur nga çingija si dajre mbi prehërin e tutorit dhe le të presim deri në fund nëse do të gjejë provat e pretenduara nga çingija do të duhet t’i gjejë vendin gishtit të akuzës që e ka mbajtur aq shumë në ajër, për të argumentuar kallzimin e paqenë!“, shkruan kryeministri.
A ju kujtohet kur thoshte “kallzim more kallzim kam bërë” duke tundur ndenjësen mbi karrige?! Kishte zbuluar një narkotrafikant në familjen time, që e kishte kallzuar në SPAK dhe aq shumë e bëri ajrin vrimë me gisht sa e detyroi narkosin e kallzuar, t’i bënte kallzim për kallzim… pic.twitter.com/Qvjauswzkt
— Edi Rama (@ediramaal) June 28, 2024
