Ministria e Drejtësisë ka përkthyer letërporosinë e mbërritur pak javë më parë nga Italia, ku autoritetet shqiptare kërkonin të dhëna për udhëtimin që familjarë të Saimir Tahirit kanë bërë me Moisi Habilajn.
Letërporosia e përkthyer në shqip tashmë i është vënë në dispozicion dy prokurorëve të çështjes, Vladimir Mara dhe Dritan Prençit.
Burime nga organi i akuzës bëjnë me dije për Vizion Plus, se në letërporosinë e ardhur nga autoritetet italiane, nuk faktohet asnjë dyshim se familjarë të ish-ministrit të Brendshëm të kenë qenë së bashku me Moisi Habilajn.
Tashmë prokurorët janë në pritje vetëm të një letërporosie nga Mali i Zi, ku janë kërkuar të dhëna po për të njëjtin udhëtim.
Një javë më parë prokuroria e krimeve të rënda vendosi të shtyjë hetimet për Tahirin, ndërsa këtë te hënë ish-ministri i Brendshëm ankimoi këtë vendim, duke kërkuar që dosja të shkojë në gjykatë.
Sajmir Tahiri është nën hetim që prej një viti. Ai dyshohet se i ka krijuar lehtësira grupit të Habilajve për të bërë trafikun e drogës drejt Italisë, duke përfituar shuma të mëdha parash.
