Një 26-vjeçar u plagos me armë zjarri mbrëmjen e kësaj të enjteje në qytetin e Fierit. Ai u qëllua nga një efektiv policie, pasi e kundërshtoi dhe sulmoi fizikisht efektivin. Burime zyrtare të policisë sqarojnë se 26-vjeçari me iniciale D.B u konfliktua me efektivët pasi tentoi të futet në rrugën e bllokuar nga policia për shkak të një koncerti që po zhvillohej në qendër.
“Rreth orës 19:20, në vendin e quajtur “Ish globi”, në qendër të qytetit të planizuar me shërbim, shërbimet e Policisë kishin bllokuar një segment rrugor për zhvillimin e një koncerti. Shtetasi D. B, 26 vjeç duke drejtuar një automjet tip “Volkswagen” është afruar te punonjësit e Policisë dhe ka tentuar të futet në rrugën e bllokuar. Punonjësit e Policisë nuk e kanë lejuar të futet brenda perimetrit të sigurisë dhe në atë momentet shtetasi D. B., ka dalë nga automjeti dhe ka qëlluar me grushte në fytyrë duke i shkaktuar dëmtime të rënda në fytyrë dhe në gojë. Inspektor Sh. J., në kushtet e vetëmbrojtjes ka qëlluar me armën e shërbimit duke e plagosur në këmbë shtetasin D. B.”
Policia thotë se i plagosuri ndodhet në spital, jashtë rrezikut për jetën. Në spital është shoqëruar edhe efektivi i cili mbeti i dëmtuar, më pas ai është dërguar në komisariat.
“Menjëherë pas marrjes së njoftimit kanë ndërhyrë shërbimet e Policisë të cilët kanë dërguar menjëherë për në spital për ndihmë mjekësore shtetasin D. B., i cili ndodhet jashtë rrezikut për jetën. Ndërkohë është shoqëruar në spital për ndihmë mjekësore dhe punonjësi i Policisë, shtetasi Sh. J. dhe pas marrjes së ndihmës mjekësore është shoqëruar në Komisariatin e Policisë për veprime të mëtejshme. Të gjitha veprimet po kryhen nga Agjencia e Mbikëqyrjes Policore në drejtimin e Prokurorisë për shmangur konfliktin e interesit. Në përfundim të veprimeve hetimore, AMP do të japi informacion të zgjeruar në lidhje me këtë ngjarje.”
