Shkencëtarët që punojnë në brigjet perëndimore të Meksikës thonë se kanë zbuluar një specie të panjohur më herët.
Tre balena me sqep u vunë re muajin e kaluar nga një ekip shkencëtarësh që punonin pranë Ishujve San Benito, rreth 300 milje nga kufiri i SHBA-së, sipas një njoftimi për shtyp të botuar të martën.
Ekipi kishte dëgjuar një sinjal akustik të paidentifikuar më parë në zonë, dhe kishte vendosur të zbulonte se nga vinte ai. Më pas ata arritën të marrin fotografi dhe regjistrime video të tre balenave, dhe gjithashtu regjistruan sinjalet e tyre akustike duke përdorur një mikrofon nënujor.
Sipas ekipit, çdo balenë lëshon një sinjal unik akustik nën ujë dhe ky tingull nuk është regjistruar kurrë më parë, plus analiza fillestare e karakteristikave fizike të balenave sugjeron se kjo është një specie e re.
“Ne pamë diçka të re. Diçka që nuk pritej në këtë zonë, diçka që nuk përputhej, as vizualisht as akustikisht, me asgjë që dihet se ekziston”, tha Barlow.
“Mendoj se mund të kemi arritur atë që shumica e njerëzve do të thoshin se ishte me të vërtetë e pamundur, gjetjen e një gjitari të madh që ekziston në tokë dhe që është krejtësisht i panjohur për shkencën”, deklaruan studiuesit Gustavo Cárdenas Hinojosa, Jay Barlow dhe Elizabeth Henderson.
