Një muaj pas ndarjes nga jeta të aktorit të famshëm Gene Hackman dhe bashkëshortes së tij, Betsy Arakawa, janë zbuluar detajet e testamentit të tyre. Hackman, fitues i dy çmimeve Oscar, i la gjithë pasurinë e tij prej 80 milionë dollarësh bashkëshortes, duke ngritur pikëpyetje mbi të ardhmen e trashëgimisë për fëmijët e tij nga martesa e parë.
Hackman, i cili ndërroi jetë në moshën 95-vjeçare, ishte i martuar me pianisten Betsy Arakawa, 65 vjeç, që nga viti 1991. Në testamentin e tij, ai e caktoi atë si administratore të pasurisë së tij, duke mos përfshirë qartësisht tre fëmijët e tij nga martesa me Faye Maltese: Christopher Allen (65), Leslie Anne (58) dhe Elizabeth Jean (62). Ky fakt ka ngritur dyshime mbi mundësinë e një sfide ligjore nga ana e fëmijëve.
Betejë ligjore në horizont?
Fakti që Hackman kishte qenë i larguar nga fëmijët e tij për vite me radhë dhe se ai kishte përditësuar testamentin në vitin 2005, kur tashmë vuante nga Alzheimeri, mund të shërbejë si bazë për një kundërshtim ligjor. Djali i tij, Christopher, ka angazhuar një avokat të njohur për çështjet e trashëgimisë, Andrew M. Katzenstein, duke lënë të kuptohet se ai synon të mbrojë interesat e tij. Ndërkohë, vajzat e aktorit nuk kanë ndërmarrë ende ndonjë hap ligjor, duke lënë të hapur .
Një ekspert ligjor i tha “DailyMail.com”: “Nëse Gene do të kishte vdekur i pari, dhe Betsy do të kishte mbijetuar, do të kishte shpërthyer një luftë e vërtetë. Fëmijët e tij do të ishin çmendur”.
Detajet e testamentit të Betsy Arakawa
Në testamentin e saj, Betsy Arakawa ka deklaruar se pasuria e saj do të kalojë në një fond bamirësie, ndërkohë që një pjesë e saj do të përdoret për shlyerjen e borxheve mjekësore. Kjo nënkupton se nëse pasuria e Hackman është përfshirë plotësisht në këtë fond, fëmijët e tij mund të mbeten jashtë çdo trashëgimie.
Në dokument, ajo thekson: “Nëse bashkëshorti im vdes, unë i jap të gjithë pasurinë time për administrim në një fond bamirësie, për qëllime që përputhen me dëshirat tona të përbashkëta gjatë jetës”.
Rrethanat e vdekjes misterioze të çiftit
Gene Hackman dhe Betsy Arakawa u gjetën të vdekur në shtëpinë e tyre në Santa Fe, New Mexico, më 26 shkurt. Hetimet zbuluan se Arakawa kishte ndërruar jetë rreth datës 11 shkurt nga një virus i rrallë i përhapur nga minjtë, ndërsa Hackman vdiq rreth një javë më vonë nga sëmundje kardiake.
Një detaj tronditës ishte gjetja e qenit të tyre 12-vjeçar, Zinna, i vdekur brenda kafazit, duke sugjeruar se kafsha kishte ngordhur nga uria dhe dehidratimi. Dy qentë e tjerë të çiftit, Bear dhe Nikita, u gjetën të gjallë dhe të shëndetshëm.
Ekspertët ligjorë kanë vënë në dukje se fakti që Hackman vdiq disa ditë pas bashkëshortes së tij mund të ketë ndikim në ndarjen e trashëgimisë. Në New Mexico, nëse një çift vdes brenda 120 orëve nga njëri-tjetri, pasuria ndahet ndryshe nga një skenar ku njëri bashkëshort mbijeton më gjatë.
E kaluara e ndërlikuar familjare e Hackman
Gene Hackman kishte një marrëdhënie të ndërlikuar me fëmijët e tij, veçanërisht me djalin e tij Christopher. Në një intervistë, ai kishte pranuar: “Isha shumë i zënë me karrierën dhe isha larg kur fëmijët e mi kishin më shumë nevojë për mua”.
Martesa e tij e parë me Faye Maltese përfundoi me divorc në 1986, pas më shumë se 30 vitesh bashkëjetesë. Ai u martua me Betsy Arakawa në 1991, dhe thuhet se ajo kishte ndihmuar për të rindërtuar marrëdhëniet e tij me fëmijët.
Në vitet e fundit, Hackman ruante kontakte të sporadike me fëmijët dhe nipërit e tij, por me Leslie kishte pasur kontakt më të shpeshtë.
Në deklaratën e tyre për mediat, Leslie dhe Elizabeth thanë se ishin “të shkatërruara” nga humbja e babait të tyre dhe e përshkruan atë si “një figurë të dashur familjare, përtej famës së tij në Hollywood”.
Çfarë do të ndodhë më pas?
Meqenëse nuk është publikuar një kopje e plotë e dokumenteve të Trustit, nuk është ende e qartë se si do të ndahet pasuria e Hackman. Ligjet në New Mexico lejojnë që pretenduesit të hapin një çështje trashëgimie deri në tre vjet pas vdekjes së një personi. Kjo do të thotë se fëmijët e tij kanë ende kohë për të kontestuar testamentin dhe për të kërkuar pjesën e tyre.
Në javët e ardhshme, pritet që ky rast të marrë një kthesë të re, ndërsa ekspertët ligjorë dhe familja e Hackman vazhdojnë të përpiqen të zbardhin të ardhmen e pasurisë së tij të madhe.
