“Mund të diskutojmë me Rusinë për gjetjen e një kompromisi për Krimenë dhe Donbasin se si të vazhdojmë jetën, por Ukraina nuk do të pranojë një ultimatum nga Kremlini”.
Kjo është deklarata e fortë e presidenti ukrainas Zelensky gjatë një interviste në ABC, që krijon hapësirë për arritjen e një kompromisi që mund t’i japë fund luftës.
“Nëse flasim për territore të pushtuara përkohësisht dhe republika që nuk njihen nga askush mund të diskutojmë dhe të gjejmë një kompromis. Për mua është e rëndësishme të di se si njerëzit që duan të jenë pjesë e Ukrainës do të jetojnë në ato territore”, tha Zelensky.
Dy milionë njerëz kanë ikur nga Ukraina
Numri i refugjatëve që kanë ikur nga lufta në Ukrainë ka kaluar dy milionë, sipas Kombeve të Bashkuara.
Filippo Grandi, Komisioneri i Lartë i OKB-së për Refugjatët, më herët e kishte quajtur eksodin masiv nga vendi si krizën e refugjatëve me rritjen më të shpejtë në Evropë që nga Lufta e Dytë Botërore.
Pjesa më e madhe e refugjatëve, rreth 1,2 milionë janë strehuar në Poloni.
rreth 90 për qind e njerëzve që largohen nga Ukraina janë qytetarë, shumica gra dhe fëmijë.
