Kur politika po përplaset për mënyrën se si do të jetë fleta e votimit, kompania sllovene që ka fituar tenderin ngre alarmin se nuk ka kohë për prodhimin e saj.
Kompania sllovene shpreh shqetësimin për përmasat e fletës së votimit. Në një letër drejtuar KQZ-së, kompania i bën të ditur se përmasat e mëdha të fletës së votimit do të kërkojnë më shumë kohë për t’u prodhuar, sidomos në një periudhë pandemie, kur masat kufizuese mund të ndryshojnë në çdo çast: “Në këtë kohë të vështirë pandemie, ku masat kufizuese mund të ndryshojnë në çdo moment, ne ju bëjmë me dije të merrni në konsideratë këto çështje. Në përfundim, ju bëjmë me dije se mund të kërkojë më shumë se 20 ditë për të prodhuar materialet zgjedhore në mënyrë të suksesshme”.
Kompania nënvizon gjithashtu se do të ishte më e përshtatshme që madhësia e fletës së votimit të jetë në përmasat 29,7 centimetra me 42 centimetra, apo i njohur si formati A3, pasi në të kundërt do të rrezikohet mos të ketë fletë për të votuar në 25 prill: “Nëse të gjitha fletët e votimit do të jenë në formatin 297×600, atëherë do të duhen nga dy deri në tre javë për të prodhuar fletën e votimit. Përsa më sipër, fatkeqësisht duket se ekzekutimi i suksesshëm dhe i sigurt për dërgimin e fletëve të votimit brenda 10 ditëve nga periudha 12-22 prill, mund të bëhet një mision i pamundur”.
