Që nga fillimi i konfliktit në Ukrainë ka pasur 39 vdekje misterioze të personazheve që kishin të bënin me presidentin rus. Rastet e Litvinenkos, Politkovskaja, Baburova, Nemtsov dhe “vetëvrasjet” Maganov e Antonov
Në Rusi, Europë dhe madje edhe në Amerikë. Ka kaq shumë armiq të betuar të Vladimir Putinit që kanë pasur një fund të keq.
Aksidente të pashpjegueshme, sulme, vetëvrasje dhe vrasje krejtësisht të shkëlqyera. Një gjurmë gjaku që përshkon kohë, që nga fillimi i viteve 2000 e deri më sot.
Sigurisht, këto janë episode të lidhura me Kremlinin krejtësisht rastësisht, të paktën derisa të vërtetohet e kundërta.
Faqja “Gbnews.com”, ka llogaritur se vetëm nga fillimi i operacionit special ushtarak në Ukrainë në shkurt të vitit të kaluar, ka pasur 39 vdekje misterioze të personazheve që kishin të bënin me presidentin rus.
Dhe tani që Prokurori i Përgjithshëm ka bërë të ditur se hetimi penal ndaj Prigozhin nuk është aspak i mbyllur siç u tha pas marrëveshjes së të shtunës, shumë njerëz mendojnë se edhe kreu i Wagnerit do të bënte mirë të ruante shpinën e tij.
Rasti i fundit që përfundoi në media, daton tre muaj më parë, kur oligarku Sergej Grishin vdiq nga septicemia në Moskë, i njohur për shitjen e vilës së tij në Kaliforni te Princ Harry dhe gruaja e tij Meghan.
Jo një personazh shumë i famshëm, por gjithsesi një ish-bankier që kishte kritikuar ashpër punën e “Zotit të Kremlinit”, si sipërmarrës të tjerë të përfshirë në zinxhirë të çuditshëm vrasjesh-vetëvrasjesh së bashku me të gjithë familjen: Vasily Melnikov, Vladislav Avayev dhe Sergei Protosenya.
Shumë më i njohur dhe i lidhur pothuajse në mënyrë të padiskutueshme me aparatet shtetërore, është rasti i Aleksej Navalny, kundërshtari kryesor politik i Putinit, i cili kishte pësuar një tentativë të bujshme helmimi në Siberi përpara se të shkonte në burg.
Ndërsa ai ishte në një takim politik, njerëzit që i përkisnin shërbimit sekret të ushtrisë, GRU-ja, kontaminuan të brendshmet e tij me preparatin kimik “Novichok”.
Dy “turistët” misteriozë rusë iu përgjigjën edhe Gru-së, i cili në vitin 2018 në Salisbury të Britanisë së Madhe, shpërndanë të njëjtën substancë nervore në dorezën e derës së një ish-agjenti rus, i cili kishte kaluar vite më parë te britanikët. Dhe se po jepte informacione të tjera të rëndësishme.
Gjithashtu në atë rast objektivi, Sergej Skripal arriti t’i mbijetonte helmimit së bashku me vajzën e tij Yulia, e cila gjithashtu kishte prekur derën.
Rasti tjetër i bujshëm në të cilin personazhet e lidhura me shërbimet sekrete ruse kanë përdorur materiale toksike (në këtë rast radioaktiv), është ai i Aleksandr Litvinenkos, një nga atentatet e para të shkëlqyera, që ndodhi në Londër në vitin 2006.
Edhe ai kishte një të kaluar si ish-agjent i “armikut”, i cili vazhdonte të shqetësonte regjimin. Dy ish kolegë të tij i shërbyen një filxhan çaj të përzier polonium në një hotel në Mayfair në Britani.
Ish-agjenti rus vdiq në spital pas një agonie të tmerrshme. Shumë më shpesh, vrasësit me qira (në Rusi nuk është zbuluar kurrë se cilët ishin nxitësit), kanë preferuar të përdorin metoda më të drejtpërdrejta, megjithëse më pak të sofistikuara.
Në të njëjtën vjeshtë të vitit 2006, gazetarja Anna Politkovskaya u qëllua për vdekje, teksa priste ashensorin e shtëpisë së saj. Në fakt dikush më parë kishte tentuar ta helmonte në avion, por nuk shkoi mirë.
Përsëri me armë zjarri u vranë disa eksponentë të organizatave të të drejtave të njeriut, si Natalia Estemirova, e rrëmbyer dhe e vrarë në vitin 2009, avokati Stanislav Markelov dhe gazetarja Anastasia Baburova, të qëlluar së bashku në të njëjtin vit.
Edhe Boris Nemtsov, një figurë kryesore e opozitës, i cili ishte gjithashtu zëvendëskryeministër nën presidencën e Boris Jelcin, u qëllua pranë Kremlinit në rrugë në vitin 2015. Raste të panumërta aksidentesh, të gjitha mjaft të çuditshme.
Si ai i Mikhail Lesin, i cili kishte qenë ministër i Informacionit me Putinin dhe që në vitin 2015 u gjet i vdekur në një dhomë hoteli në Uashington. Autopsia konstatoi se ai kishte pirë sasi të mëdha alkooli dhe kishte përplasur dhunshëm kokën.
E dyshimtë ishte gjithashtu edhe vdekja e ish-oligarkut, i cili kishte qenë shumë i afërt me Putinin përpara se të ndahej, Boris Berezovsky. Në vitin 2013, trupi i tij u gjet në banjën e vilës së tij në Surrey.
Rastet kanë qenë fatale për disa kritikë të Kremlinit. Më të njohurit, ndoshta, janë ish-kryetari i kompanisë së naftës “Lukoil”, Ravil Maganov dhe miliarderi Pavel Antonov, të cilët të dy vdiqën vitin e kaluar, pasi thanë gjëra jo të përshtatshme për Operacionin Special Ushtarak rus në Ukrainë.
Maganov ra nga dritarja e një spitali në Moskë, ndërsa Antonov fluturoi nga dritarja e një hoteli, ndërsa ishte në Indi për të festuar ditëlindjen e tij./Corriere della Sera
