Nga Aurenc Bebja*, Francë
“Le Figaro” ka botuar, të mërkurën e 11 marsit 1914, në faqen n°2, intervistën ekskluzive me Turhan Pashën, asokohe i sapo emëruar kryeministër i Shqipërisë, të cilën, Aurenc Bebja, nëpërmjet Blogut “Dars (Klos), Mat – Albania”, e ka sjellë për publikun shqiptar:
Turhan Pasha
Vjenë, 10 mars.
Zgjedhja e Turhan Pashës si Kryeministër i Shqipërisë është pritur mirë në qarqet shqiptare në Vjenë. Argumentohet se kreu i ri i qeverisë, i vlerësuar mirë në Berlin, është gjithashtu persona grata në Shën Petersburg. Prania e tij në Durrës mund ta ndihmojë shumë princin të shpëtojë nga ndikimi tepër ekskluziv i Italisë dhe Austrisë. Për më tepër, nuk është indiferente të dihet se Turhan Pasha, i cili flet në mënyrë të admirueshme greqishten, ka marrëdhëniet më të mira me z. Streit dhe diplomacinë helene.
Turhan Pasha më priti këtë mëngjes me shumë përzemërsi.
“— Unë jam, më tha ai, një nga abonuesit më të vjetër të Le Figaro, leximi i të cilës ka qenë gjithmonë, edhe kur isha në Siri ose Arabi, një nga zakonet e mia më të dashura. Unë gjithmonë e kam dashur Francën dhe një nga keqardhjet e mia më të thella ishte që të hiqja dorë nga ambasada e Parisit në 1895. Unë tashmë i kisha letrat e mia kredenciale për z. Casimir-Perier, kur u detyrova, në interes të vendit tim, të pranoja postin më të ekspozuar atë të guvernatorit të Kretës.”
Turhan Pasha më konfirmoi se ai kishte rënë dakord përfundimisht për të formuar ministrinë e parë të Shqipërisë. Lidhur me të ardhmen e principatës, ai është shumë optimist.
“— Ejani, më tha ai, të na shihni në Durrës, shpresoj që shumë francezë të vijnë që të kuptojnë se Shqipëria dhe shqiptarët vlejnë më shumë se reputacioni i tyre.” — z. RAY.
*Burimi: Blogu © Dars (Klos), Mat – Albania
