Presidenti amerikan Donald Trump udhëtoi në Miçigan, një nga shtetet kyçe të betejës elektorale, për të vizituar impiantin e kompanisë prestigjioze të automjeteve “Ford Motor”.
Trump, i cili më herët pati një përplasje me guvernatoren demokrate të Miçiganit, zgjodhi të mos mbante veshur maskën mbrojtëse kur u shfaq para gazetarëve dhe fotografëve që udhëtonin me të.
Trump vizitoi impiantin e “Ford” pasi kompania ka marrë përsipër të prodhojë aparate frymëmarrjeje dhe pajisje mbrojtëse nga koronavirusi.
Shefi i Shtëpisë së Bardhë vazhdimisht ka shpërfillur udhëzimet e qendrave amerikane për kontrollin e sëmundjeve që u bënin thirrje qytetarëve që të veshin maska për të frenuar epideminë e virusit.
I rrethuar nga drejtuesit e kompanisë “Ford”, ai u shpreh se e kishte mbajtur një të tillë jashtë shikimit të kamerave.
“E kisha veshur, e kisha veshur qëparë në pjesën e mbrapme, por nuk doja t’i jepja shtypit kënaqësinë për ta parë atë. Por tani nuk po e mbaj. Megjithatë mbajta pajisje të tjera…”, deklaroi me ironi Trump.
Më tej, ndonëse me ngurrim, Trump shtoi se së shpejti do të rifillojë mitingjet elektorale, ndoshta në Florida dhe Xhorxhia.
