Referencat në futboll janë të pafundme dhe, midis sezoneve dhe ngjarjeve historike, ndodh që ato të ofrojnë mundësi të shijshme për hakmarrje. Ajo që Ronaldo do të përjetojë kundër Lionit, të premten, do të jetë një nga këto mundësi, me ngarkesën e tij të kujtimeve për të marrë hak. Po, sepse, përveç triumfit që do t’i lejonte Juventusit të kualifikohej në çerekfinalen e Ligës së Kampionëve, portugezi ka mundësinë e madhe “të heqë nga këpucët një guralec” shumë personal të rivalit që e dënoi me eliminim më 2010, kur vishte fanellën e Real Madridit.
Precedenti
Ishte viti i parë i CR7 në Spanjë, pas transferimit milioner nga Manchester United. Pas një faze triumfuese në grup, “Los Blancos” u përballën me Lion në 16-she. Me “vetëm” një Champions dhe një “Top të Artë” nën emrin e tij, portugezi zbarkoi në Spanjë për t’u bërë simbol i “Galacticos”, por papritur përfundoi i eliminuar nga përballja e dyfishtë europiane kundër francezëve. Ishte Real Madridi i Casillas, Xabi Alonso, Kaka dhe Higuain (i cili, gjithashtu, ka mundësi për hakmarrje të premten, si CR7), por Lion qe në gjendje të godiste fort. Çuditërisht, edhe atëherë, Ronaldo duhej të gëlltiste një “nokaut” të papritur. Ndeshja e parë kishte përfunduar me të njëjtin rezultat, që Juventus do të duhet ta përmbysë mbrëmjen e së premtes, 1-0. Real Madridi i Ronaldos u kthye nga Lioni duarbosh, pas një prove të zbehtë dhe zhgënjyese. Ndeshja u vendos nga një gol i shkëlqyeshëm i Makoun, në fillimin e pjesës së dytë. Por, rastësitë nuk mbarojnë këtu.
Një histori për t’u fshirë
Në mesin e protagonistëve të atij konfrontimi të dyfishtë, që shënoi eliminimin e fundit të Ronaldos në 16-she të Champions-it (1/8 finale) ishte edhe Pjanic, në moshën 20 vjeç. Boshnjaku ishte protagonisti absolut, si në ndeshjen e parë, duke e dëshmuar veten ndër më të mirët në fushë. Në kthim ai shënoi për barazimin 1-1, i cili e dërgoi Lionin në parajsë. Goli i tij në minutën e 75-të heshti një “Bernabeu” të pabesueshëm. Ajo mbrëmje shënoi përfundimisht fatin e Manuel Pellegrinit në pankinën e “Los Blancos”, por ishte gjithashtu një makth për Higuain, i cili shpërdoroi dy raste të bujshme. Mund të vëmë bast se, ashtu si CR7, edhe “Pipita” e kujton atë mbrëmje jo të këndshme, duke ushqyer të njëjtën dëshirë për hakmarrje. Një motiv shtesë për të dy, me qëllimin për ta shtyrë Juventusin drejt përmbysjes dhe kualifikimit. Tifozët e Juventusit mbështeten në këtë, duke shpresuar se këtë herë historia nuk do të përsëritet njësoj…
