Dy kushtet që duhet të plotësojë çdo udhëtar që shkon në Itali me avion

Çdo pasagjer që udhëton drejt Italisë nuk do të pranohet të hipë në avion nëse nuk ka maskë kirurgjikale dhe nuk plotëson formularin e vetë deklarimit. Dy kërkesa të tilla janë bërë nga Agjencia Kombëtare e Aviacionit Civil Italian për pasagjerët që udhëtojnë nga Shqipëria për në Itali, me qëllim që procesi i kalimit të udhëtarëve nëpër aeroporte të lehtësohet.

“Çdo pasagjer që udhëton drejt Italisë duhet të jetë i pajisur vetëm me maskë kirurgjikale. Pasagjerët që përdorin lloje të tjera të maskave, mund të mos lejohen të hipin ne bordin e avionit.

Formularët e vetëdeklarimit duhet të printohen dhe të plotësohen paraprakisht. Njëra kopje duhet të dorëzohet në momentin e check-in (te pranimit të biletës) dhe kopja tjetër duhet të dorëzohet tek autoritetet lokale italiane në destinacionin e mbërritjes.

Plotësimi i formularit para udhëtimit ndihmon në minimizimin e qëndrimit për një kohë të gjatë në radhë gjatë procesit të kontrollit”, thuhet në njoftimin e Aeroportit Ndërkombëtar të Tiranës.