Rusia është ofruar që të zhvillojë bisedime për t’i dhënë fund luftimeve mes Armenisë dhe Azerbajxhanit për rajonin e diskutuar të Nagorno-Karabakh.
Ministri i Jashtëm rus Sergei Lavrov u bëri ofertën dy qeverive për të ndërmjetësuar bisedimet. Zyra e tij e shtypit deklaroi se ministri Lavrov kishte nxitur dy vendet që të ndalojnë retorikën e luftës.
Ai ka thërritur në zyrën e tij ministrat e Jashtëm të Armenisë dhe Azerbajxhanit. Më shumë se 100 persona kanë vdekur në harkun kohor të 5 ditëve që kur nisën luftimet. Rajoni Nagorno-Karabakh është pjesë e Azerbajxhanit por drejtohet nga armenë etnikë.
Një ditë më parë, Presidenti rus Vladimir Putin zhvilloi një bisedë telefonike me Presidentin francez Macron për këtë konflikt, dhe të dy bënë thirrje për armëpushim të menjëhershëm mes Armenisë dhe Azerbajxhanit.
Rusia është pjesë e një aleance ushtarake me Armeninë dhe ka një bazë ushtarake në vend. Sidoqoftë, Rusia ka lidhje të ngushtë edhe me qeverinë e Azerbajxhanit.
Presidenti i Azerbajxhanit: Luftojmë derisa ushtria armene të largohet nga tokat tona
Presidenti i Azerbajxhanit, Ilham Aliyev, u zotua se do të luftojë derisa forcat armene të largohen nga territori i kontestueshëm i Nagorno Karabakut.
Luftimet atje kanë hyrë në ditën e katërt.
“Ne kemi vetëm një kusht: forcat e armatosura armene duhet t’i lënë pa kushte, plotësisht dhe menjëherë tokat tona”, tha Aliyev.
Më shumë se 100 njerëz janë raportuar të vrarë në luftimet më të rënda në vitet e fundit mbi rajonin e Nagorno Karabakut.
Zyrtarisht pjesë e Azerbajxhanit, ai qeveriset nga armenët etnikë.
Dy republikat sovjetike kanë zhvilluar një luftë për territorin më 1988-1994.
Është e paqartë se çfarë i ka shkaktuar luftimet e fundit dhe ka shqetësime se fuqitë ndërkombëtare mund të tërhiqen në konflikt.
Të mërkurën, presidenti i Francës, Emmanuel Macron, tha se është “jashtëzakonisht i shqetësuar nga mesazhet luftarake” që vijnë nga Turqia – një aleate e Azerbajxhanit.
Ministri i Jashtëm turk, Mevlut Cavusoglu, e akuzoi Macronin për mbështetje të okupimit.
Turqia ka thënë se është “plotësisht e gatshme” ta ndihmojë Azerbajxhanin në rikthimin e enklavës.
