I ri, por me ide të qarta. Mbrojtësi shqiptar prezantohet në Trigoria: Më kërkonin shumë skuadra, por kur më telefonoi Roma, nuk pata më dyshime.
“Thashethemet në lidhje me Lazio? Kishte gjithashtu shumë fjalë për klube të tjera. Por, kur Roma më telefonoi, unë nuk hezitova dhe tani jam shumë i lumtur. Këtu kam ardhur për një hap më cilësor në karrierë”. Blerja e fundit e Romës, Marash Kumbulla, i lindur më 2000, ardhur nga Hellas Verona, u prezantua në “Trigoria” me të njëjtin personalitet që luajti në “Olimpico” me rastin e debutimit të tij kundër Juventusit.
“Mbeta shumë i lumtur me debutimin, – shtoi ai. – Ta bëja këtë kundër bardhezinjve ishte vërtet emocionuese. Sidoqoftë, kam gjithashtu një aluzion keqardhjeje që nuk ishim në gjendje të merrnim tri pikët. Ne e merituam të fitonim”. Shqiptari është shtesa e fundit në një mbrojtje që numëron gjithashtu Mancini (24-vjeç) dhe Ibanez (22-vjeç): “Të luash në një mbrojtje kaq të re është motivim më shumë. Pavarësisht nga mosha, ne kemi treguar se jemi kohezivë dhe të përqendruar. Kjo është gjithashtu një arsye më shumë për të ardhmen, pasi jemi të rinj dhe mund të përmirësohemi ende. Por, nuk duhet të harrojmë se ka edhe lojtarë të tjerë në mbrojtje”.
Midis këtyre, Juan Jesus dhe Fazio, startuesit e mundshëm në vendin e Chris Smalling, i cili u largua këtë verë drejt Premier League: “Ai ka një karrierë plot fitore dhe suksese. Gjithsesi, tani për tani po mendoj vetëm për shokët e mi aktualë të skuadrës, si ta përmirësojmë kohezionin tonë”. Nga një mbrojtje me tre në tjetrën, Kumbulla ndalet gjithashtu në ndryshimet midis Fonseca dhe ish-trajnerit të tij te Hellas Verona, Juric: “Ajo që ndryshon është aspekti taktik. Me Juric u rrita individualisht. Me Fonseca shoh që i kushton vëmendje të mbrojturit si repart”.
Në fund, disa fjalë për negociatën e rrufeshme, që e solli atë te verdhekuqtë: “Unë isha shumë i ngazëllyer, transferimi ndodhi shumë shpejt. Nuk hezitova fare për Romën, padyshim, qoftë duke pasur parasysh klubin, ashtu edhe qytetin, tifozët. Pra, e pata të lehtë për të zgjedhur. Largimi nga Verona ishte i vështirë, por këtu erdha për një hap më cilësor në karrierë”.
