Federico Chiesa dhe Juventusi janë duke u afruar çdo ditë. Rocco Commisso, presidenti i Fiorentinës, konfirmoi se lojtari i lindur më 1997 do të jetë në fushë kundër Sampdoria. Pastaj, megjithatë, ai mund të bëhet lojtar i Juventusit gjatë fundjavës.
Anësori italian, sipas “Corriere della Sera” mund t’i kushtojë Juventusit rreth 50 milionë euro, edhe pse Fiorentina nuk do të dëshironte të binte nën 60 milionë. Ndërmjetësit e operacionit do të kërkojnë përputhje të kërkesë-ofertës, duke pasur parasysh krizën e madhe financiare që po kalojnë klubet e futbollit prej Covid-19. Formula e marrëveshjes do të ishte ajo e huazimit me të drejtën e blerjes përfundimtare. Kjo e fundit do të bëhej e detyrueshme me arritjen e disa kushteve. Kostoja e huazimit të rëndë sezonal do të ishte 10 milionë euro.
Bardhezinjtë mund ta blejnë Chiesa, pavarësisht nga shitja e Douglas Costa, i cili ende konsiderohet një lojtar në largim; ashtu si De Sciglio, Rugani dhe Khedira. “Zonja e Vjetër” shpreson të jetë në gjendje të marrë yllin e kombëtares italiane me paratë e rimbursuara nga shitja e “tepricave” të sipërcituara. Megjithatë, koha po fluturon, merkatoja mbyllet më 5 tetor.
Edhe vitin e kaluar, anësori vjollcë ishte nisur drejt Torinos, por ardhja e presidentit Commisso ndryshoi gjithçka. Në çdo rast, Chiesa tashmë ia ka bërë të ditur klubit se është i gatshëm të qëndrojë në rast të mosmarrëveshjes, por nuk do ta rinovojë kontratën që i skadon më 2022.
Fiorentina, gjithsesi është e hapur për ta shitur, ndaj ka ulur pretendimet e saj. Kjo është arsyeja pse Juventusi sheh shanse për të blerë një tjetër përforcim, në një verë revolucionesh dhe ndryshimesh të konsiderueshme.
