Ndonëse shumë vende janë duke u përballur me një mungesë të theksuar fondesh për t’u përballuar me pandeminë e koronavirusit, një zhvillim i fundit në Britani i ka habitur të gjithë. Kryeministri Johnson deklaroi se do të prezantojë investimet më të mëdha në ushtri, të cilat nuk kanë ndodhur në 30 vitet e fundit.
Çfarë fshihet pas
Britania pritet të shpallë investimin më të madh ushtarak që nga fundi i Luftës së Ftohtë, pavarësisht krizës së koronavirusit që ka varfëruar ekonominë ndërsa kërkon rolin e saj pas Brexit në skenën botërore.
Kryeministri Boris Johnson dëshiron të fitojë një rol udhëheqës për Britaninë në epokën e re të bashkëpunimit global dhe tregtisë së lirë, të cilën ai synon ta forcojë me aftësi moderne ushtarake dhe kibernetike, komentojnë disa media.
Johnson tha se investimet e rritura pasqyrojnë një nevojë për të përmirësuar aftësinë ushtarake, e cila përfshin teknologji të reja së bashku me planet për një komandë të re hapësinore dhe agjenci të inteligjencës artificiale.
Në një fjalim në parlament të enjten, duke dhënë një përmbledhje të shkurtër të përfundimeve të para nga analiza më e madhe e politikës së jashtme dhe të mbrojtjes në tre dekada, Johnson do të shpallë një shtesë prej 16.5 miliardë funte për ushtrinë gjatë katër viteve të ardhshme. Buxheti ushtarak aktualisht është pak më pak se 42 miliardë funte në vit.
“Unë e mora këtë vendim në mes të një pandemie sepse mbrojtja e mbretërisë duhet të jetë e para”, tha Johnson në një deklaratë.
“Situata ndërkombëtare është më e rrezikshme dhe më konkurruese se në çdo kohë që nga Lufta e Ftohtë”, tha Johnson, duke shtuar se Britania duhet të qëndrojë pranë aleatëve të saj. “Për ta arritur atë, ne duhet të forcojmë kapacitetet tona të plota.”
Në një kohë të pasigurisë globale në rritje dhe ngritjes së vazhdueshme të Kinës, dhe pas katër vjet diplomacie ndërkombëtare të Presidentit të SHBA Donald Trump, vendimi i Britanisë për vitin 2016 për të lënë Bashkimin Evropian e vuri në pikëpyetje rolin e saj dhe ndikimin global.
Vendimi për investimin e ri erdhi shtatë ditë pasi Johnson i tha Presidentit të zgjedhur Joe Biden se Britania ishte e vendosur të mbetet aleati i tij i vlefshëm ushtarak.
Sekretari i Mbrojtjes Ben Wallace ka thënë se Britania nuk do të investojë në ushtri në kurriz të fondeve ndërkombëtare të ndihmës, pas raporteve të medias se miliarda paund do të tërhiqen nga buxheti i ndihmës së huaj.
Përfundimet e plota të analizës së mbrojtjes dhe sigurisë do të publikohen vitin e ardhshëm.
