Një burrë amerikan, i cili jeton në Jutah, ka vendosur që oborrin e shtëpisë së tij ta vërë në dispozicion të të pastrehëve. Darin Mann ka vendosur aty disa tenda, ku mirëpret ata që nuk kanë një shtëpi dhe i lejon madje që të përdorin tualetin e banesës së tij.
“Qëllimi im është që të ndryshoj këndvështrimin me të cilin shihet një person i pastrehë. Çdo njeri meriton të trajtohet me dinjitet dhe të ndihmohet kur ka nevojë për ndihmë”, deklaron burri amerikan për CNN.
Ai i ka ngritur tendat në mes të janarit dhe aktualisht, aty jetojnë 15 persona.
“Dua të tregoj se problemi i të pastrehëve zgjidhet duke punuar si një komunitet dhe jo duke pasur frikë. Ata më ndihmojnë që të pastroj oborrin dhe janë shembull pune për të pastrehët e tjerë”, shton Mann.
Por, fqinjët e burrit zemërgjerë nuk e mendojnë kështu, dhe kanë dërguar disa ankesa në komunë, duke kërkuar largimin e të pastrehëve nga zona ku banojnë.
