Babai gjerman dhe nëna holandeze. Po flasim për Robin Gosens, lojtarin anësor të Atalantës që ka zgjedhur të luajë për kombëtaren gjermane, drejtuesit e së cilës deri një vit më parë nuk e njihnin fare si futbollist.
Pas paraqitjes që bëri ndaj Portugalisë, Gosens është kthyer në një hero për gjermanët, por fati i tij mund të kishte qenë shumë ndryshe nga ai i futbollistit profesionist. Historinë e ka treguar babai i tij për “SPOX”, duke rrëfyer se Gosens ishte gati të bëhej polic.
“Ishte thuajse një zyrtar i policisë. Nuk u pranua në Nord-Reno Westfalia, sepse këmbët e tij kishin një diferencë prej 0.5 milimetrash nga njëra-tjetra, por në Rheinland-Pfalz e kishte kaluar testin e parë. Unë i thashë: ‘mund të provosh sërish vitin e ardhshëm’“, tregoi babai i Robin.
Më pas ndryshoi gjithçka, me eksperiencën te Vitesse.
“Aty ishte vërtet kthesa e madhe. Ndihej shumë mirë me shokët në Holandë, por ambienti i tij mbeti fshati ynë”, – shton babai. Dhe kështu Robin Gosens tani mahnit jo vetëm Atalantën, por gjithë Gjermaninë, si një polic i munguar që vë në radhë rivalët e tij.
