Partitë opozitare në Mal të Zi hoqën dorë nga iniciativa për të votuar mocionin e mosbesimit ndaj qeverisë së Zdravko Krivokapiç.
Opozita gjatë tërë kohës pohonte se për këtë iniciativë ka 41 deputetë nga 81 sa numëron Parlamenti i Malit të Zi, por siç duket nuk ia doli të sigurojë një votë nga partitë në pushtet, megjithëse nga këto të fundit u akuzua se ka zhvilluar bisedime te fshehta.
Sipas opozitës të kryesuar nga Partia Demokratike e Socialistëve e Presidentit Millo Gjukanoviç, arsyeja për tërheqje të nismës, ishte paralajmërimi i partisë në pushtet Fronti Demokratik pro serb, i cili ka paralajmëruar se do të dorëzojë iniciativën për shkurtimin e mandatit të parlamentit.
Fronti Demokratik thotë, se do të kërkojë dhe organizimin e zgjedhjeve të jashtëzakonshme mirëpo “këtë propozim nuk e kanë pranuar partnerët e koalicionit qeverisës” dhe se Fronti nuk ka numrin e duhur për jetësimin e kësaj nisme.
Krivokapiç: Dështimi i mocionit të mosbesimit fitore e qeverisë
I menjëhershëm ka qenë reagimi i kryeministrit Zdravko Krivokapiç. Pas dështimit të mocionit të mosbesimit ai në një konferencë shtypi tha, se tërheqja e opozitës është fitore për qeverinë që ai udhëheq. “Kjo është loja e atyre që tentuan që me korrupsionin politik të fitojnë vota”. Kryeministri ka thënë po ashtu se Partia Demokratike e Socialistëve ka shpenzuar 20 milionë euro në tentativë për të rrëzuar qeverinë.
Kryeministri i Malit të Zi ka thënë po ashtu se qeveria do të japë dorëheqje në fund të qershorit të vitit 2022, nëse nuk realizohet buxheti. Ndërsa në parlament vazhdojnë akuzat e ndërsjellta ndërmjet opozitës dhe partive të koalicionit qeverisës dhe në radhët e vetë koalicionit, kriza politike në Mal të Zi thellohet gjithnjë e më shumë. Qytetarët po ashtu janë të pakënaqur me punën e qeverisë.
Hulumtimet e bëra nga “Qendra për demokratizim dhe të drejtat e njeriut” të cilat u prezantuan nga drejtoresha Milena Beshi# dhe që kishin të bënin me hulumtimin e opinionit publik nga data 1 deri më 11 dhjetor 2021 treguan se një në tre të anketuar, respektivisht 33,1 % janë shumë të pakënaqur me punën e qeverisë. Po ashtu hulumtimet e bëra tregojnë, se Mali i Zi është duke shkuar drejt rrugës së gabuar dhe se në pyetjen se a duhen shpallur zgjedhjet e jashtëzakonshme 31,7 % e të anketuarve mendojnë se ato duhen shpallur sa më parë, ndërkohë që 26,2 % theksojnë se zgjedhjet e jashtëzakonshme nuk duhet të shpallen.
