CIA ka realizuar së fundmi një hetim, i cili ka arritur në konkluzionet se diplomatët amerikanë që u prekën nga dhimbje të pashpjegueshme koke në disa përfaqësi diplomatike që tashmë njihet me emrin “Sindroma e Havanës”, nuk kanë qenë objekt sulmi nga një shtet i huaj.
Raporti mbi qindra raste të raportuara të sëmundjes misterioze neurologjike përjashton në shumicën e rasteve një sulm nga një kundërshtar i huaj.
“Ne vlerësojmë se shumica e raportimeve për të tilla incidente anormale shëndetësore mund të shpjegohen në mënyrë të arsyeshme nga kushtet mjekësore ose faktorët mjedisorë dhe teknikë, duke përfshirë sëmundjet e padiagnostikuara më parë”, tha një zyrtar i lartë i CIA-s.
Duke përmbledhur gjetjet e një task force të brendshme të CIA-s për hetimin e këtyre rasteve, zyrtari i cituar nga CBS tha: “Në këtë hetim të gjerë deri më tani nuk kemi gjetur prova të përfshirjes së aktorit shtetëror në ndonjë incident”, duke shtuar se “vlerësojmë atë nuk ka gjasa që një aktor i huaj, përfshirë Rusinë, të kryejë një fushatë të qëndrueshme, mbarëbotërore, duke dëmtuar personelin amerikan me një armë ose mekanizëm.”
CIA thekson se raporti përmban gjetje paraprake dhe nuk është përfundimtar.
Disa prej diplomatëve të prekur kanë shprehur pakënaqësi me raportin dhe thonë se vlerësimi i CIA-s nuk mund të jetë fjala përfundimtare në këtë çështje.
Megjithatë, CIA do të vazhdojë të hetojë një numër të vogël rastesh, shkaku i të cilave nuk mund të përcaktohet dhe nuk përjashtohet përfshirja e një aktori të huaj.
Gjetjet e CIA-s, të cilat pasqyrojnë këndvështrimin aktual të komunitetit të inteligjencës, vijnë në kohën e një përpjekjeje të vazhdueshme dhe të gjerë të qeverisë amerikane për të kuptuar dhe identifikuar shkakun e fatkeqësisë misterioze, e cila karakterizohet nga simptoma si të përziera, marramendje, zhurma në vesh dhe dhimbje koke, dhe shpesh paraprihet nga një ndjesi nxehtësie ose presioni. Incidentet së pari u raportuan nga personeli në ambasadën e SHBA-së në Havana, Kubë, në vitin 2016.
Që atëherë ka pasur raportime të ngjashme nga disa diplomatë amerikanë, oficerë të inteligjencës dhe personel ushtarak të stacionuar ose që udhëtojnë në vende në mbarë botën – duke përfshirë Austrinë, Kolumbinë, Gjermaninë, Serbinë, Indinë, Vietnamin dhe të tjerë – shumë prej të cilave rezultuan në kthimin e tyre në SHBA për trajtim mjekësor. Ka pasur gjithashtu raste të raportuara në tokën amerikane si në Uashington, DC, Virxhinia Veriore dhe Boston.
Në vitin 2020, një studim nga Akademitë Kombëtare të Shkencave i porositur nga Departamenti i Shtetit tha se shkaku “më i besueshëm” ishte “energjia e drejtuar, pulsuese, e radiofrekuencës”.
Ai studim, së bashku me prova të tjera të qarkulluara nga zyrtarë aktualë dhe ish-amerikanë, ushqeu hipoteza jozyrtare se rastet ishin rezultat i përpjekjes për mbledhjen e inteligjencës nga operativë rusë.
