Kryetari i Partisë Demokratike, Sali Berisha, u shpreh këtë të premte se Kosova është sulmuar kibernetikisht nga sistemet e Shqipërisë.
“Kosova është sulmuar nga sistemet e Shqipërisë. Mali i Zi gjithashtu është në atak dhe Maqedonia. Nuk e di nëse janë sulmuar nga sistemet shqiptare këto të fundit. Por për Kosovën është e sigurt që janë sulmuar nga sistemet shqiptare. Çka do të thotë një penetrim i plotë i hakerave serbë ose rusë sepse dihet se problemet më madhore me Kosovën i kanë. E vërteta është se mbrojtja e Kosovës dhe persona të kësaj fushe ka deklaruar se sulmet janë nga rajoni”, u shpreh Berisha.
Ish-kryeministri tha më herët se përveç hakerave iranianë në operacionin për shkatërrimin e infrastrukturës dixhitale në Shqipëri kanë marrë pjesë hakera të qeverisë, hakera rusë dhe serbë.
“Dua të informoj shqiptarët me përgjegjësi të plotë nga burime të trefishta se në operacionin e shkatërrimit të infrastrukturës dixhitale në Shqipëri janë përveç të tjerash hakera iraniane, janë pjesëmarrës hakera të qeverisë, hakera rusë dhe serbë. Kjo është një e vërtetë e konfirmuar për opozitën, nga burime shumë serioze”, u shpreh Berisha.
