Pas Libohovës, kreu i Partisë Demokratike Sali Berisha është ndalur në Lazarat të Gjirokastrës, që njihet si bastion i së djathtës. Ai i përcolli edhe një mesazh kryeministrit Rama se “nuk ka asnjë forcë që mund ta shpërbëjë Lazaratin, pasi do të marrë përgjigjen e merituar.
“Dua të përulem me nderimin më të madh, me mirënjohjen më të thellë, para jush, për mbështetjen e jashtëzakonshme që ju i keni dhënë PD-së që nga themelimi i saj. Dua të shpreh krenarinë time të madhe me këtë mbështetje dhe t’ju garantoj se ndjehem krenar me mbështetjen e secilit prej jush, se ndjehem i detyruar pafundësisht ndaj jush, njerëz fisnikë, atdhetarë, punëtorë, për kontributin tuaj në demokraci, për kontributin tuaj si bastion i pamposhtur i atdhetarizmit. Vij këtu nga Libohova dhe një mik i imi më tha se Edi Rama i paska thënë një socialisti të thekur, se Libohovën dua ta vë në heshtje dhe Lazaratin ta shpërbëj fare. I them Edi Ramës se nuk ka asnjë forcë ta shpërbëjë Lazaratin. Këtë u përpoq ta bëjë diktatura më e egër dhe ata përfunduan në koshat e historisë dhe Lazarati mbeti bastion i lirisë. Prandaj ideja e vazhdimit të etërve të tu mizorë, të persekutimit të Lazaratit, do marrë përgjigjen e merituar në zgjedhjet e ardhshme, do marrë përgjigjen e merituar në mbarë Shqipërinë”.
Berisha u premtoi banorëve të Lazaratit se potencialet e tyre do të kenë prosperitetin që meritojnë, ndërsa propozimet e tyre, tha ai, do të jenë e rëndësishme e programit të PD-së.
“Unë kam ardhur këtu te ju, për t’u zotuar përpara jush, se me deputetin tuaj, me Dasho Alikon, i cili në një moment kritik kur regjimi u vërsul me egërsi ndaj jush, qëndroi me ju dhe nuk u mposht. Kam ardhur këtu për t’u zotuar se potencialet tuaja do kenë prosperitetin që meritojnë. Këtë regjim ta përzëmë sa më shpejt dhe të vendosim demokracinë në Shqipërinë. Unë kam ardhur për të dëgjuar zërin tuaj, propozimet tuaja, mençurinë tuaj, që do jenë pjesë e rëndësishme e programit të PD-së”.
