Daniel Michael DeVito Jr., i njohur në art si Danny DeVito i është rikthyer origjinës së tij të largët shqiptare duke konfirmuar se gjyshja e tij fliste në dialektin gegë.
Lajmi u bë i ditur gjatë emisionit virtual “The Always Sunny Podcast”, i cili transmetohet në Youtube.
“Një nga gjyshërit e mi është nga Kalabria, e cila është pikërisht në çizmet e Italisë dhe pikërisht atje është Shqipëria”, u shpreh fillimisht DeVito.
Aktori kujton kohën kur ishte ende një fëmijë i vogël dhe gjyshja e tij fliste dialektin gegë.
“Ajo ishte tashmë 80 vjeç, duke qëndruar e shtrirë në një shtrat, pasi theu ijën e saj, histori tragjike. Por ideja është që ajo fliste një gjuhë të quajtur gegë dhe tani disa njerëz mund ta dinë se çfarë është kjo, disa njerëz mund të dinë se çfarë është kjo është një lloj gjuhe hibride shqiptare që ishte në gjuhën italiane-shqiptare”, ngatërron DeVito duke iu referuar dialektit të gegërishtes me rajonin e Kalabrisë.
Më tej, aktori dhe tregon se sa e bukur ishte gegërishtja për të dhe sa bukur tingëllonte.
Nuk mund të mungonin as batutat nga ana e tij: “Gjyshit tim sigurisht që nuk i pëlqente sepse ajo fliste me shoqet e saj dhe kaq ishte historia”.
Danny DeVito e ka deklaruar më herët në televizion prejardhjen e tij arbëreshe kur ishte i ftuar nga i famshmi Regis Philbin, gjithashtu me origjinë arbëreshe nga nëna e tij, i cili iu drejtua DeVitos live dhe tha se të dy ishin arbëreshë, ndërsa Danny DeVito u përgjigj: “Po Philbin, ke të drejtë, por ti je gjysmë, se babai yt është irlandez, e unë jam arbëresh me nënë e baba”.
