Foshnja e Khadija-s nuk ka ende një emër dhe për momentin po jeton në një çadër të vendosur në anë të rrugës. Ajo erdhi në jetë vetëm disa minuta para se të ndodhte tërmeti që shkaktoi mijëra viktima të premten në Marok.
Edhe pse nënë e bijë nuk pësuan lëndime si pasojë e lëkundjeve të forta, spitali në Marrakesh ku ato ndodheshin u evakuua. Dhe, pas një kontrolli të shpejtë, atyre iu kërkua që të largoheshin nga godina, tri orë pas lindjes.
“Na thanë se duhej të largoheshim nga frika e pasgoditjeve”, tregon Khadija.
Me fëmijën e porsalindur në krah, Khadija dhe bashkëshorti i saj tentuan që të merrnin një taksi dhe të shkonin në shtëpinë e tyre në Taddart, në Atlas, por rrugët ishin të gjitha të bllokuara.
Tashmë, familja e re jeton në një çadër në një rrugë të fshatit Asni.
“Nuk kam marrë asnjë lloj ndihme nga autoritetet”, tregon nëna për mediat. “Na kanë ndihmuar banorët këtu me batanije. Tani kemi vetëm Zotin.”
Khadija tregon se për vajzën e saj të vogël ka vetëm një palë rroba. Megjithatë, ajo dhe e porsalindura e saj patën fatin që të dilnin të palënduara nga tërmeti. Të paktën 2100 persona të tjerë patën tjetër fat.
Ekipet e kërkim-shpëtimit vijojnë punën e tyre duke kërkuar nëpër gërmadhat që la pas goditja me magnitutë 6.8 të shkallës Rihter.
Ky ishte tërmeti më i fuqishëm që ka goditur Marokun në më shumë se 120 vite. Shumë persona rezultojnë ende të zhdukur.
Dëmet nga ky tërmet i fuqishëm janë të konsiderueshme. Ndërtesa të shumta në qytetin e vjetër të Marrakesh janë shembur, një vend i njohur i Trashëgimisë Botërore i vizituar çdo vit nga miliona turiste nga e gjithë bota.
Mbreti Mohammed VI i Marokut shpalli tre ditë zie dhe urdhëroi xhamitë në mbarë vendin të mbajnë lutje për viktimat.
