Një nga aleatët më të vendosur të Ukrainës, Polonia, ka njoftuar se nuk do të furnizojë më armë për vendin, pasi një mosmarrëveshje diplomatike për drithërat përshkallëzohet.
Kryeministri i Polonisë, Mateusz Morawiecki tha se në vend të kësaj do të fokusohej në armatosjen me armë më moderne. Lëvizja vjen pasi tensionet midis dy kombeve rriten.
Të martën, Polonia thirri ambasadorin e Ukrainës lidhur me komentet e bëra nga Presidenti Volodymyr Zelensky në OKB.
Ai tha mes të tjerash se “disa vende tregojnë solidaritet të shtirur për Ukrainën”, deklaratë të cilën Varshava e cilësoi të pajustifikuar dhe fyese pasi Polonia ka qenë në krah të Kievit që në ditët e para të luftës.
Kryeministri i Polonisë, Mateusz Morawiecki, njoftoi vendimin për të mos furnizuar më Ukrainën me armë në një fjalim televiziv të mërkurën, pas një dite me tensione të përshkallëzuara të shpejta midis dy vendeve për importet e grurit.
“Ne nuk po transferojmë më armë në Ukrainë, sepse tani po armatosim Poloninë me armë më moderne,” tha zoti Morawiecki.
Mosmarrëveshja e grurit filloi pas pushtimit të plotë të Ukrainës nga Rusia që mbylli korsitë kryesore të transportit të Detit të Zi dhe e detyroi Ukrainën të gjente rrugë alternative tokësore.
Kjo nga ana tjetër çoi në sasi të mëdha drithi që përfundonin në Evropën Qendrore. Rrjedhimisht, Bashkimi Evropian ndaloi përkohësisht importet e grurit në pesë vende; Bullgaria, Hungaria, Polonia, Rumania dhe Sllovakia për të mbrojtur fermerët vendas, të cilët kishin frikë se drithi ukrainas do ulte çmimet në vend.
Ndalimi përfundoi më 15 shtator dhe BE zgjodhi të mos e rinovojë atë, por Hungaria, Sllovakia dhe Polonia vendosën të vazhdojnë ta zbatojnë atë.
Komisioni Evropian ka deklaruar vazhdimisht se nuk i takon anëtarëve individualë të BE-së të bëjnë politikën tregtare për bllokun.
Në fillim të kësaj jave, Ukraina ngriti padi në Organizatën Botërore të Tregtisë (OBT) kundër këtyre vendeve lidhur me ndalimet, të cilat sipas saj ishin një shkelje e detyrimeve ndërkombëtare.
Polonia tha se do ta mbante ndalimin në fuqi dhe një “ankesë përpara OBT-së nuk na bën përshtypje”.
Polonia i ka ofruar shumë mbështetje Ukrainës, ndërsa i ka kërkuar Gjermanisë që t’i sigurojë vendit tanke luftarake Leopard 2, duke premtuar avionë luftarakë në vend dhe duke mirëpritur më shumë se 1.5 milion refugjatë nga Ukraina.
