Kryeministri Edi Rama ka reaguar pas takimeve në Bruksel të kryeministrit të Kosovës, Albin Kurti dhe Presidentit serb, Aleksandër Vuçiç. Pasi shpreh kënaqësinë për vendimin e duhur të Kosovës për propozimin e BE-së, Rama thotë se Prishtina zyrtare është në një pozitë më të mirë sot dhe ky është një hap shumë i rëndësishëm përpara.
“Urtësia e popullit shqiptar dhe jo vetëm e tij në fakt, mëson se “më mirë vonë se sa kurrë”. Nuk mund ta fsheh kënaqësinë time që udhëheqja e Kosovës më në fund bëri gjënë e duhur në takimin e djeshëm të Brukselit! Duke pranuar me mençuri propozimin e BE-së më 21 tetor Kosova sot ndodhet në një pozitë shumë më të mirë. Ky është një hap shumë i rëndësishëm përpara”, tha Rama.
Të thirrje pati edhe për Serbinë që të bëjë të njëjtën gjë, pra të pranojë propozimin e BE-së. Një thirrje e pati edhe për partnerët perëndimorë.
“Është koha kritike që Serbia të bëjë të njëjtën gjë. Çdo gjë e pranuar dhe dakordësuar deri tani duhet të zbatohet pa vonesë. U bëj thirrje partnerëve tanë perëndimorë që të mbajnë këtë momentum dhe të shtyjnë palët drejt zgjidhjes përfundimtare”, u shpreh Rama.
Kreu i qeverisë thotë se rajoni jonë ka nevojë për paqe.
“Mjaft më duke parë gishtin teksa gishti tregon hënën. Mjaft më me të njëjtat muhabete të vjetra dhe të rrezikshme. Mjaft më me shmangien e paqes dhe ushqimin e fantazma të së kaluarës për hir të vogëlsisë së politikës së brendshme. Shikoni jo shumë larg nga këtu se çfarë u ndodh atyre që i shmangen paqes dhe angazhohen në lojëra “o të gjitha o asgjë”. Ne kemi nevojë për paqe, stabilitet dhe bashkëpunim në këtë lagje të Europës. Bëni paqe paj Zotin dhe shikoni përpara”, shkruan Rama.
Takimet e Brukselit të kryeministrit të Kosovës Albin Kurti dhe presidentit serb Aleksandër Vuçiç përfunduan pa ndonjë marrëveshje të nënshkruar.
Megjithatë, Kosova pranoi në parim kornizën e statutit të asociacionit të komunave serbe, sipas planit të ri të propozuar nga 5 emisarët e BE-së dhe SHBA-së pak ditë më parë në Prishtinë dhe Beograd.
Miratimi u dha nga Kurti pasi zhvilloi takim me kancelarin gjerman, Presidentin Francez, kryeministren Italiane, përfaqësuesin e lartë të BE Borrell dhe ndërmjetuesin e dialogut Miroslav Lajcak. Ne një takim të veçuar në Bruksel për normalizmin e marrëdhënieve mes dy vendeve ishte edhe Presidenti Vuçiç.
Kryeministri Kurti, thotë se vetëm nënshkrimi i marrëveshjeve garanton zbatimin e tyre. Pas takimeve Kurti e Vuçiç nuk patën deklarata për mediat. Qeveria e Kosovës, shpërndau në orët e vona një deklaratë për mediat ku deklaroi se Vuçiç kishte refuzuar te nënshkruante.
