Pasagjerët në një fluturim të Singapore Airlines të goditur nga turbulenca të forta të martën përshkruan një rënie të papritur, dramatike pasi “ferri shpërtheu” në bordin e avionit Boeing me 229 pasagjerë dhe ekuipazh.
CNN sjell dëshminë e pasagjerit Andrew Davies, i cili po udhëtonte për në Zelandën e Re për biznes. Ai tregon se pas afërsisht 13 orësh fluturim, ishte duke parë një film kur pa tabelën e rripit të sigurimit të ndezur, kështu që vendosi rripin e sigurimit.
“Mirë që e vendosa, sepse brenda pak çasteve, ndodhi e papritura e tmerrshme”, tha ai për CNN. Sipas tij shumë pasagjerë ishin duke ngrënë mëngjes në momentin e ngjarjes.
“Avioni thjesht u ndje sikur ra. Ndoshta zgjati vetëm disa sekonda, por më kujtohet qartë se pashë këpucë, iPad dhe iPhone, jastëkë, batanije, pjata dhe gota që fluturonin në ajër dhe përplaseshin në tavan. Zotëria pranë meje piu një filxhan kafe, e cila shkoi drejt e mbi mua dhe deri në tavan, “tha Davies.
Pamjet nga avioni më pas tregojnë kabinën rrëmujë, me letra, gota dhe kana me ujë të shpërndara në dysheme, dhe panele tavani dhe tubacione të varura lirshëm.
Davies ishte ulur në pjesën e përparme të avionit dhe dëshmoi disa nga lëndimet që pësuan dhjetëra pasagjerë, duke përfshirë edhe pasagjerin britanik 73-vjeçar Geoff Kitchen, i cili vdiq në fluturim.
“Ai zotëri ishte ulur pas meje. Shumë njerëz kishin nevojë për ndihmë, por ne u përkujdesëm për këtë zotëri, dhe unë e ndihmova, ta largoja nga vendi dhe e shtrimë në dysheme në mënyrë që disa profesione mjekësore të mund të administronin CPR”.
“Kishte aq shumë ulërima dhe lëndimet e njerëzve ishin evidente”, tha më tej ai. Kur u kthye, ai pa “një pasagjere me një plagë të madhe në kokë dhe gjak që i derdhej në fytyrë dhe një pasagjere tjetër të moshuar në “shok të rëndë”.
Një tjetër pasagjer, studenti 28-vjeçar Dzafran Azmir, i tha Reuters se avioni kishte filluar “të anonte” dhe të dridhej.
“Shumë befas pati një rënie shumë dramatike, kështu që të gjithë të ulur dhe pa vendosur rripin e sigurimit u hodhën menjëherë në tavan. Disa njerëz goditën kokën në kabinat e bagazheve sipër dhe goditën vendet ku janë dritat dhe maskat që shpërthyen”.
Azmir shtoi se e gjithë kjo ishte “shumë e shpejtë. Kjo është arsyeja pse unë mendoj se askush nuk mund t’i përgjigjej me të vërtetë. Njerëzit nuk patën kohë të reagonin. Kishte pasagjerë në banjat e avionit dhe ekuipazhi ishte ende në këmbë kur u godit nga turbulencat”.
Fluturimi u devijua në Bangkok pas incidentit. Nga 211 pasagjerët dhe 18 anëtarët e ekuipazhit në bordin e fluturimit, 143 prej tyre u transportuan nëpërmjet një fluturimi ndihmash për në Singapor.
79 pasagjerët e mbetur dhe 6 anëtarë të ekuipazhit janë ende në Bangkok, përfshirë ata që marrin kujdes mjekësor dhe anëtarët e familjeve të tyre.
Disa pasagjerë kishin thyer krahët, por shumica e lëndimeve ishin prerje dhe mavijosje, shtoi ai.
Të plagosurit përfshinin shtetas nga Australia, Malajzia, Mbretëria e Bashkuar, Zelanda e Re, Spanja, Shtetet e Bashkuara dhe Irlanda, sipas spitalit ku ata u trajtuan.
Menaxheri i përgjithshëm i aeroportit të Bangkok, Kittipong Kittikachorn, tha të martën se hetimet paraprake tregojnë se pasagjeri britanik humbi jetën si pasojë e një ataku kardiak, por autopsia do të përcaktojë shkakun.
Ministria e Transportit e Singaporit po heton incidentin, duke thënë të martën se ishte në kontakt me homologët e saj tajlandez dhe do të dërgonte hetues në Bangkok. Bordi Kombëtar i Sigurisë së Transportit të SHBA po dërgon gjithashtu personel në Singapor për të ndihmuar hetimin, duke përfshirë një përfaqësues të bordit dhe katër këshilltarë teknikë.
