Ministrja e Infrastrukturës, Belinda Balluku e nisi me “dorë të hekurt” detyrën e re që i besoi kryeministri Edi Rama duke çmontuar në vetëm pak kohë “klanin” Gjiknuri në institucionin që drejton.
Ajo shkarkoi disa drejtorë të rëndësishëm, ku i pari në listë ishte kreu i ARRSH-së, Afrim Qendro, i prekur nga skandali i “Unazës së Madhe” të Tiranës.
Por, Balluku nuk është ndalur tek lëvizjet e fillimit, pasi po vijon me operacionin e saj “fshesa”.
Sot ministrja ka shkarkuar nga detyra drejtorin e kompanisë Albpetrol, Kastriot Bejtaj.
Ai është gjeofizikant dhe ish-drejtues i SHELL dhe Petromanas.
Dyshohet se shkak i ndryshimit të drejtorit është tenderi me vlerë 2.5 miliardë lekë të rinj për 75 mijë ton naftë bruto.
Në vend të tij është emëruar Dritan Spahiu, i cili ka mbajtur më herën postin e drejtorit të Marrëveshjeve për Hidrokarburet në Ministrinë e Infrastrukturës.
Bejtaj u emërua në krye të “Albpetrol” në janar të 2018, pas largimit të drejtorit të mëparshëm Endri Puka.
