Presidenti serb Aleksandar Vuçiç deklaroi të mërkurën në Paris se iniciativa mini Shengen është e denjë për vëmendje, duke kujtuar vlerësimin e Bankës Botërore që zbatimi i saj do t’u kursente vendeve të Ballkanit Perëndimor 3.5 miliardë euro.
“Ekstremistët, si shqiptarë, ashtu edhe serbë, dhe çfarëdo që të doni, kundërshtojnë çdo gjë që i bashkon njerëzit, ata kundërshtojnë çdo gjë që sjell paqe, stabilitet dhe zhvillim. Ata dëshirojnë të shijojnë ujin e ndenjur dhe stanjacionin, ku nuk ka përparim”, u tha Vuçiç gazetarëve serbë në Paris.
Vuçiç vuri në dukje se gjëja tjetër, kur bëhet fjalë për iniciativën, është nëse të gjitha vendet do të jenë në gjendje t’i rezistojnë presionit.
“Ne nuk kemi linja të shpejta për kamionë, kështu që kamionët tanë kalojnë 100 orë në vendkalimet kufitare , duke pritur, dhe unë do t’ju kujtoj se Banka Botërore vlerësoi që vendet e Ballkanit Perëndimor (ËB6) do të kursenin 3.5 miliardë euro nëse do të ishim në gjendje ta zbatonim këtë iniciativë dhe ta bënin efektive”, u tha Vuçiç gazetarëve në Paris.
Presidenti serb tha se shprehte keqardhjen që nuk mund të fliste ose të arrinte rezultate serioze me njerëz që, siç tha ai, nuk kishin vizion, nuk kuptonin asgjë, dhe qëllimi kryesor i ekzistencës së tyre ishte të mallkonin, të godisnin apo të vizatonin grafite në ndërtesën e teatrit.
