Presidenti amerikan, Joe Biden, bëri një kthesë të madhe nga politikat ndërkombëtare të paraardhësit të tij, Donald Trump.
“Amerika është kthyer sërish për të marrë vendin që i takon në lidershipin botëror”, tha ai duke folur në konferencën e sigurisë së Mynihut.
Kreu i Shtëpisë së Bardhë, kërkoi front të përbashkët me Bashkimin Europian përballë fushatave dashakeqase të Rusisë dhe Kinës.
Biden nënvizoi se përkushtimi amerikan në aleancën ushtarake NATO është i palëkundur dhe konfirmoi zhbërjen e vendimit për tërheqjen e trupave nga baza në Gjermani.
“Putini kërkon të dobësojë Europën, projektin europian dhe Aleancën tonë të NATO-s”, tha presidenti amerikan duke shtuar se synimi i Rusisë është të sulmojë demokracitë dhe të mbështesë korrupsionin.
“Një sulm ndaj njërit prej nesh, është një sulm ndaj të gjithëve”, u shpreh Biden në konferencën e sigurisë së Mynihut.
