Gazetari investigativ Artan Hoxha zbuloi ekskluzivisht në studion e Abc News video nga momenti i vrasjes së Guxim Gjyriçi më 6 janar, akt i cili mund të nxitë një tjetër valë hakmarrjesh në Tropojë.
Përballë gazetarit Endri Xhafo, Artan Hoxha shpjegoi se kishte shkuar në Tropojë për të investiguar mbi vrasjen në fjalë duke zbuluar detaje të rëndësishme.
“Ngjarja ka ndodhur në skaj të vendit. Në një qytet të vogël. Larg kryeqytetit. Larg syrit të medias dhe autoriteteve. Është vrasje me mesazh dhe paralajmëron një zinxhir vrasjesh siç kanë ndodhur më parë.
Pse e cilësoj shqetësuese? Jemi 11 ditë nga atentati dhe ajo është një ngjarje e spostuar. U tha që u gjet një makinë e djegur, u tha se u qëllua nga një makinë me kallashnikov. Të gjithë këto nuk ka një përputhje me ato që pash unë në Bajram Curri, në Has apo Gjakove ku mendohet se mund të kenë ikur autorët.
Çfarë ndodhi mesnatën e 5 janarit.
Guxim Gjyriçi babai i tre fëmijëve, pronar i një lokali në Bajram Curri. Pasditë ka dalë nga banesa, ka bërë një pushim nga ora 16:00 dhe është kthyer në lokal duke parë një ndeshje nga ora 22:15 minuta. Të afërmit janë larguar për një kafe dhe Guximi ka mbetur i vetëm në atë vend.
Është raportuar që ka ndodhur në orën 23:40 minuta, por viktima është vrarë shumë më parë. Këtë moment e tregojnë kamerat e sigurisë. Ne po publikojmë. Kemi dy automjete që largohen nga vendi i ngjarjes. Është një Benz dhe një Ford Fiesta që largohen. Kjo e dyta është 17 sekonda pas Benzit. Ford Fiesta është automjeti që u gjet në Golaj i djegur.
Janë pamje të siguruara privatisht nga unë. Uroj që policia të ketë sekuestruar të gjitha kamerat e HEC-it të Fierzës që filmojnë kalimin në drejtm të Qafë Malit. Rruga e largimit është e mbuluar nga kamera.
Uroj që të jenë marrë këto kamera“, shpjegon Artan Hoxha.
Më tej ai vijoi duke shpjeguar se çfarë tregojnë këto pamje.
“Tregojnë orarin kur ka ndodhur ngjarja. Kufoma është gjetur 40 minuta pasi ka ndodhur vrasja. Në këtë kohë ata kanë patur mundësi të largohen me shpejtësi nga Morina, nga Qafa e Luzhës për në Krumë dhe Kukës. Aty ka një urë që mund të bllokohej. Mund të shihen edhe kamerat që ka patur në këto drejtime.
Autorët kanë lënë mbrapa një makinë të djegur që shohim në pamje. Kjo është makina e dytë dhe jo e para.
Nga informacionet me rezulton që njëra nga makinat e dyshuara ka dalë nga Qafa e Morinës dhe ka hyrë në Gjakovë dhe është futur sërish në Golaj dhe ka marrë pjesëtarin tjetër të grupit që ka djegur Ford Fiesta. Dogana është shumë afër aty.
Nëse shikoni, në automjetin e parë që nukë shtë fiksuar në skenën e krimit nga dëshmitarët.
Autorët kanë vëzhguar lëvizjet e Guximit, sepse ai nuk mbrohej dhe lokali qëndronte hapur deri pas mesnate“, vijoi gazetari.
Guxim Gjyriçi u vra duke gdhirë data 6 janar. Ai është vëllai i Agron Gjyriçit, një shok i ngushtë i Fatmir Haklajt duke patur edhe detyrë të rëndësishme gjatë kohës kur komisariati i Bajram Currit drejtohej nga ai. Ka dyshime se vrasja e Guximit është një mesazh ndaj vëllait të tij.
“Një ish-pjesëtar i forcave speciale dyshohet se ekzekutoi me 13 plumba Gjyriçin”
Artan Hoxha tha se dyshohet se pas vrasjes fshihet një ish-pjestar i forcave speciale të Shqipërisë.
“Dyshohet se është një pjesëtar i forcave speciale dhe po verifikohet vendi ku ai ishte në momentin e ngjarjes.
Dyshimet janë edhe për një personazh shumë të fuqishëm i botës së krimit në zonë. Nuk është përjashtuar edhe një kombinacion i këtij grupi personash të jenë bërë bashke për të goditur. Kjo gjë ka ndodhur edhe kur u sulmuan Haklajt dhe aty kishte disa grupe që u bashkuan kundër tyre”, tha Hoxha.
“Shumë qytetarë të Tropojës kanë mbetur të tronditur nga efekti i kësaj ngjarje e cila ka tronditur opinionin. Policia atje ka një prezence minimale, nuk arrinin dot të ndalonin vrasjet.
Ajo që del nga ngjarja e fundit dhe që është pjesë e hetimit është arma e përdorur.
Goditja mbas shpine që i është bërë viktimës, fakti që në skemën e krimit ka pasur vrasës profesionistë është pamundur që të mos kenë pasur mbështetje, ka ndihmës, dhe persona që e njohin mirë qytetin. Mund të jetë më orgjinë apo të ketë banuar aty.
Kjo ngjarje do të ketë vijim do të kemi informacione të tjera që nuk u publikuan sot. Qëllimi është që të parandalohen ngjarjet e tjera. Një dekadë e gjysëm ai vend u kthye i pabanueshëm. Sot jemi 11 ditë mbas një ngjarjes e cila rrezikon të kthejë një situatë e cila nuk do ta dëshironte askush“, theksoi ndër të tjera gazetari.
