Kryeopozitari Lulzim Basha ka reaguar pasi kryebashkiaku i ri i Kamzës, Rakip Suli, hyri në zyrë. Basha thotë se bashkia e Kamzës është zaptuar me dhunë dhe se Suli u ndihmua nga Sali Skura, shef i komisariatit.
“Hajduti Rakip Suli me ndihmën e banditit Sali Skura dhunuan dhe zaptuan sot me forcë selinë e Bashkisë Kamëz. Për dhunën hajdutërore të dy këta kriminelë do të përgjigjen shpejt para ligjit! Uroj për të mirën e tyre dhe të Hajdutit Psiqik, që ajo ditë të vijë më shpejt se dita e përballjes me zemërimin e popullit”, shprehet Basha.
Kreu i PD-së lëshon akuza të tjera për Sulin dhe Skurën dhe i paralajmëron se do të përgjigjen përpara ligjit.
“Rakip Suli ky hajdut i milionave të shqiptarëve me tendera dhe qira që i përfitoi kur ishte deputet në konflikt të pastër interesi, duhet të ishte ndjekur penalisht dhe dënuar. Sali Skura i dosjes 184 që ngrinte postblloqe për të ndaluar votuesit e opozitës duhet të ishte në burg”, thotë ai.
Sipas bashës, “sa kohë Edi Rama është në zyrën e kryeministrit, nuk do ketë as drejtësi dhe as demokraci, banditët, kriminelët dhe hajdutët do të sundojnë Shqipërinë.”
“Shporrja e Hajdutit Psiqik dhe bandës së tij është jetike për sigurinë dhe jetën e çdo familje shqiptare”, mbyll reagimin kreu i demokratëve.
