Bashkimi Evropian kundërshton një ftesë të pakushtëzuar për Rusinë, që do të mundësonte ribashkimin e saj në bisedimet mes lidereve botërorë të G7-ës. Pohimin e bëri për Reuters një zyrtar i lartë europian.
Shtatë udhëheqësit e vendeve më të zhvilluara dhe industrializuara te globit do të takohen këtë fundjavë në resortin francez të Biarritz. Formati, i njohur dikur si G8 e përfshinte edhe Rusinë, por ajo u përjashtua prej radhëve të tij në 2014-ën, pas aneksimit të Krimesë dhe mbështetjes që Moska u dha rebelëve në lindje të vendit.
Duke folur në kushte anonimiteti, zyrtari u shpreh se arsyet e përjashtimit të Rusisë “mbeten të vlefshme” dhe se çdo ofertë kthimi do të ishte në fakt “një shenjë dobësie”. Presidenti amerikan, Donald Trump është shprehur se mbështet kthimin e Moskës në grupin e G7-ës, takimin e të cilit, Shtetet e Bashkuara do ta organizojnë vitin që vjen.
Deklarata e tij erdhi disa ditë para se të mbërrijë në jug të Francës për të marrë pjesë në samitin e sivjetshëm të grupit.
“Është shumë më e përshtatshme të kemi Rusinë aty. Duhet të kthehet në G8, sepse shumë gjëra për të cilat ne flasim kanë të bëjnë pikërisht me të”, ka qenë komenti i presidentit amerikan.
