Kryetari i PD-së Sali Berisha zhvilloi sot një takim me Forumin Rinor të Partisë Demokratike.
Në fjalën e tij, Berisha tha se takimi vjen në një moment, kritik për vendin, për demokracinë, për të ardhmen.
Ai theksoi se tre ditë më parë Eurostati njofton se nga 2014 deri në fund të 2022 numri i shqiptarëve të larguar vetëm në hapësirën e BE-së, ka arritur 934 mijë vetë.
“Ka arritur pra në më shumë se 33% të popullatës, por po të shtojmë këtu edhe ata që janë larguar në vendet jo anëtare të BE-së, kjo shifër shkon edhe te 35% së paku. Imagjinoni se në çfarë situate është katandisur sot, ky komb dhe ky vend. Kur lexon këto shifra dhe sheh ju këtu, secili mund të habitet se edhe pse ju nuk keni ikur. Jetojmë sot në një kohë kur ky vend braktiset dhe vetëm braktiset. Braktiset natën, ditën, braktiset me anije, braktiset me rrugë tokësore, braktiset me rrugë ajrore. Ju garantoj se nuk po braktiset vetëm vendi nga popullata, por po braktiset e nesërmja për vendin. Ky vend nëse vazhdon kështu, nuk ka të nesërme, nuk ka të ardhme. Ky vend sot ka nevojë më shumë kurrë të shpëtohet. Luftërat i largojnë njerëzit, në luftëra vdesin nga fronti, nga sëmundje nga shumë probleme. Vendi që është pakësuar në histori më shumë nga luftërat dhe ishte luftë botërore ka qenë Polonia dhe ajo ka humbur 20% të popullit të vet, me të vrarë, me largim etj. Shqipëria humbet në një hark kohore 8-vjeçar, 35 % të popullsisë së vendit”, tha Berisha.
