Ka nisur në Napoli gjyqi ndaj Raffaele Imperiales (ende në pritje të ekstradimit nga Emiratet e Bashkuara) dhe 20 bashkëpunëtorëve të tij. Bosi, me origjinë nga Castellammare di Stabia, u arrestua në vitin 2021 dhe tani si bashkëpunëtor i drejtësisë, është në gjyq për importimin e shtatë tonëve kokainë në Evropë
Kur trafikanti i drogës Raffaele Imperiale filloi të bashkëpunonte me hetuesit italianë, ndër të tjera tha se blinte “40 kilogramë ar në muaj”.
Me paratë e pastruara bleu edhe dy piktura të vjedhura të Van Gogh-ut dhe tani i ka dorëzuar autoriteteve italiane një ishull që zotëron, i cili ndodhet në një arkipelag përballë Dubait. Quhet “Tajvan” dhe është artificial.
Narko-trafikanti nga Castellammare di Stabia, akuzohet se ka importuar të paktën 7 tonë kokainë në Evropë nga viti 2017 deri në 2021-in dhe se ka krijuar një organizatë të aftë për të eksportuar drogë dhe për të pastruar para, duke përdorur një sistem të veçantë dhe të pagjurmueshëm të qarkullimit të parave, të quajtur “Hawala”, i regjistruar vetëm në Dubai.
Lajmi
Lajmin e ka bërë të ditur sot zv/prokurori Maurizio De Marco në gjyqin ku janë edhe rreth njëzet të pandehur, përfshirë edhe trafikantin ndërkombëtar të drogës, i cili ndodhet në Emiratet e BashkuaraArabe në pritje të ekstradimit në Romë.
Prokurori i dorëzoi gjithashtu gjyqtares Maria Luisa Miranda disa dokumente që përmbajnë dy dokumente me të cilat Imperiale njofton vendimin e tij.
Kush është
Imperiale është një kriminel atipik, bir i borgjezisë provinciale (ai ka lindur në Castellammare di Stabia), ku më pas u bë një nga trafikantët më të mëdhenj të drogës në botë, duke blerë tonelata drogë direkt nga kartelet kolumbiane, duke pasur një likuiditet të madh.
“Për një periudhë, në vitin 2020, bleva ar në Tarì, të cilin e çova në Gjermani. Blinim deri në 40 kilogramë ar në javë. Riinvestova gjithsej 30/40 milionë në ar”, u tha ai magjistratëve napolitanë.
Bosi i penduar napolitan i organizatës mafioze “Camorra”, ka derdhur shuma për të ricikluar edhe duke blerë art: për shembull dy piktura të Van Gogh të vjedhura në Holandë.
Historia e tij kriminale u shfaq vetëm në vitin 2000, kur hetuesit e kthyen në qendër të vëmendjes dhe dokumentuan marrëdhëniet e Imperiales me anëtarët e klanit “Di Lauro” të Secondigliano-s në Napoli.
Arrestimi dhe pendimi
Vitet e fundit ai ka jetuar në Dubai, nga ku u ekstradua në vitin 2022. Pastaj në Itali, ai pendohet dhe fillon të bashkëpunojë me Prokurorinë e Napolit, sepse, siç thotë ai, është “i lodhur” nga të qenit në arrati dhe gati “të ndryshojë jetën e tij”.
Procesi
Në gjyqin që po zhvillohet në Napoli, i cili po bëhet me gjykimin e shkurtuar para gjykatëses Maria Luisa Miranda, përveç trafikantit ndërkombëtar të drogës, akuzohen edhe bashkëpunëtorët e tij më të afërt, si Bruno Carbone, ortaku i tij në biznes, Corrado Genovese, kontabilist i grupit, Daniele Ursini, menaxher i logjistikës dhe një sërë bashkëpunëtorësh dhe punonjësish.
Sot, gjatë seancës që po zhvillohet në dhomën 116 të Pallatit të Ri të Drejtësisë në Napoli, u ngrit një përjashtim nga ekipi i mbrojtjes në lidhje me përdorimin e bisedave “Encrochat” dhe “Sky ECC”, të përgjuara nga autoritetet franceze dhe që janë pjesë e përmbledhjes akuzuese të Prokurorisë së Napolit.
Pas pezullimit të seancës për shqyrtimin e kërkesës, gjyqtarja vendosi të refuzojë kërkesën për pezullim të avokatëve, të cilët e panë të arsyeshme të prisnin vendimin e seksioneve të përbashkëta të Gjykatës së Lartë të Kasacionit në lidhje me përdorimin e këtyre bisedave.
Sekuestro
Gjatë seancës që po zhvillohet në Gjykatën e Napolit para gjyqtares së seancës paraprake Maria Luisa Miranda, prokurori antimafia i Napolit, Maurizio De Marco, kujtoi sekuestrimet e kryera deri më tani nga autoriteti gjyqësor, ku përfshihej edhe një arsenal mbresëlënës i gjetur marsin e kaluar në Giugliano në Campania dhe blerja e “thesarit” në bitcoin, me vlerë 1.8 milionë euro, që i atribuohet gjithashtu trafikantit ndërkombëtar të drogës Raffaele Imperiale, i aneksuar nga Italia në 16 nëntor 2022 dhe kaluar Fondit të Vetëm për Drejtësi.
Ku është Raffaele Imperiale
Raffaele Imperiale banonte në Dubai, ku u arrestua më 4 gusht 2021. Aktualisht ndodhet i ndaluar në Emiratet e Bashkuara Arabe, ndërkohë që Ministria Italiane e Drejtësisë po përfundon procedurat e ekstradimit.
Nga informacionet e pakta të rrjedhura nga hetimet, Imperiale shpenzoi rreth 400 mijë euro në muaj në Dubai për të ruajtur stilin e tij luksoz të jetesës.
Para se të kapej, ish-trafikanti i drogës dyshohet se ka paguar 7 milionë euro në vetëm tre muaj për të financuar arratisjen e tij./Corriere della Sera
