Ish- kryetari i Gjykatës së Kasacionit, Zef Brozi u bën thirrje qytetarëve që do të marrin pjesë në protestën e organizuar nga opozita që të mos bien pre e politikanëve që bëjnë thirrje për dhunë e shkatërrim.
Ai thotë se dhuna është në interes vetëm të atyre politikanëve të korruptuar që po i frikësohen dhe duhet t’i frikësohen përditë e më shumë Reformës në Drejtësi.
“U bëj apel të gjithë pjesëmarrësve në protestën e 16 Shkurtit në Tiranë që të protestojnë paqësisht dhe të dëshmojnë se janë të denjë t’i bashkohen familjes së Bashkimit Europian për të cilën ne shqiptarët ëndërrojmë që prej shumë vitesh.
Veçanërisht u bëj apel protestuesve që të mos bien pre e atyre politikanëve që bëjnë thirrje për dhunë e shkatërrim.
Protestat qytetare e paqësore janë shprehje e demokracisë, ndërsa dhuna e cfarë do natyre qoftë është në interes vetëm të atyre politikanëve të korruptuar që po i frikësohen dhe duhet t’i frikësohen përditë e më shumë Reformës në Drejtësi.
Ata duan ta sabotojnë edhe pranimin e Shqipërisë sonë të dashur në Bashkimin Europian. U bëj apel drejtuesve dhe forcave të policisë që të mos bien në grackën e provokimeve që mund të bëhen gjatë protestës, por të veprojnë me profesionalizëm e gjakftohtësi në respektim e zbatim të ligjit” thotë Brozi.
Nesër në orën 11:00 opozita do të protestojë përballë Kryeministrisë kundër qeverisë Rama.
