Armët e Rusisë: Cilat janë dhe pse Putin thotë se në arsenalin e Moskës janë mjete ushtarake “që kundërshtarët e tij nuk i kanë ende”.
Andrea Marinelli dhe Guido Olimpio*
“Nëse Rusia kërcënohet, ajo do të përgjigjet me mjete që kundërshtarët e saj ende nuk i kanë”.
Vladimir Putin lëshoi paralajmërimin e tij ndaj Perëndimit, përgjegjës sipas tij për furnizimin e materialit luftarak në Ukrainë dhe për kërcënimin e vetë “ekzistencës” së vendit të tij.
Një frazë me të cilën, në fillim të konfliktit, Kremlini i ishte referuar përdorimit të armëve bërthamore, një spektër që më vonë u largua si nga Moska ashtu edhe nga inteligjenca perëndimore.
Tani, presidenti rus është rikthyer për të folur për konfliktin e shtrirë tek mbështetësit e Kievit.
“Nëse dikush nga jashtë synon të ndërhyjë në ngjarjet e Ukrainës dhe të përbëjë një kërcënim për Rusinë, përgjigja jonë do të jetë e shpejtë”, – paralajmëroi ai në një fjalim në Parlament, duke evokuar “kërcënime gjeopolitike” ndaj Rusisë.
“Ne kemi mjete që askush nuk i ka dhe do t’i përdorim nëse është e nevojshme. Unë dua që të gjithë ta dinë”.
Dërgimi i armëve në Ukrainë dhe vende të tjera, konfirmoi zëdhënësi i Kremlinit, Dmitri Peskov, përbën “një kërcënim për sigurinë e Evropës”.
Por cilat janë armët në dispozicion të ushtrisë ruse?
Samat
Raketë ndërkontinentale, me rreze veprimi 18,000 kilometra, 200 tonë, e pajisur me koka të shumta. Sipas projektuesve, ka aftësi më të madhe për të shpuar mburojën mbrojtëse amerikane.
Për këtë arsye, “Cari i ri”, thotë se armiqtë do të mendohen “dy herë” përpara se të sfidojnë Moskën, e cila e ka riemërtuar edhe atë “Satan 2” (klasifikimi zyrtar është RS28).
Avangard
Ka hasur – siç ndodh shpesh – probleme zhvillimi, është një pajisje strategjike me manovrim të madh. Ndjek trajektore të ndryshme nga ato të transportuesve ndërkontinental.
Hipersonik, mund të godasë një objektiv 6000 kilometra larg. Mban koka bërthamore ose konvencionale. Duhet të ishte në shërbim për më shumë se një vit.
Poseidon
Bëhet fjalë për një super-silur, i njohur edhe si “Status 6” dhe me karakteristika të ngjashme me ato të një droni-nënujor.
I projektuar për të goditur formacionet detare, por edhe brigjet e armikut me një kokë bërthamore.
Ai “udhëton” në një thellësi rreth një mijë metra dhe me një shpejtësi prej rreth 130 km/h, ka si helikë një reaktor. Mund të jetë e vështirë për ta kapur atë. Për momentin – sipas ekspertit HI Sutton – nuk është ende funksional.
Burevestnik
Raketa e lundrimit, gjithashtu me energji bërthamore, me një rreze të vlerësuar midis 10,000 dhe 20,000 kilometra, fluturon në lartësi të ulët.
Rusët, si mjete të tjera speciale, nënvizojnë se sa e vështirë është të ndalohet. Në vitin 2019, ka ndodhur një aksident gjatë një testi me vdekjen e disa “teknikëve”: ka mundësi të jetë një provë e sistemit.
Kinzhal
Raketë hipersonike, e përdorur gjatë konfliktit në Ukrainë. Arma mund të lëshohet nga një avion luftarak ose një bombardues Tu23, ka një shpejtësi dhjetë herë më të madhe se ajo e zërit dhe një rreze veprimi prej 2000 kilometrash. Shumë i manovrueshëm, ai mbart një ngarkesë bërthamore ose konvencionale.
Zircon
Një tjetër pajisje hipersonike, rreze veprimi 500-1000 kilometra. Për ekspertët mund të përdoret kundër objektivave të mëdhenj tokësorë, por edhe formacioneve detare.
Në fund të dhjetorit, forcat e armatosura kryen një stërvitje me nisjen e 10 kroçerave nga një fregatë dhe dy të tjera nga një nëndetëse.
Komenti i Kremlinit ishte domethënës: “Një ngjarje e madhe në historinë e vendit, një hap themelor për të rritur aftësitë mbrojtëse”.
Fab-3000
I dizajnit sovjetik, i porositur në vitin 1946, “Fab-3000” peshon 3 tonë dhe ka një masë shpërthyese prej 1400 kilogramësh.
Ka një rreze shkatërrimi prej rreth 50 metrash, por fragmentet mund të arrijnë deri në 260 dhe është projektuar për të shkatërruar zonat industriale dhe portale.
Është e mundur që rusët duan ta përdorin atë për të goditur portin e Mariupolit dhe fabrikën e çelikut “Azovstal”, në tunelet e nëndheshme të së cilës rezistenca ukrainase ka mbetur e rrethuar.
Është një armë e fuqishme, por konvencionale, anti-bunker, e përdorur tashmë nga BRSS-ja në Afganistan në vitet 1980.
Armët kimike ose biologjike
Ato janë municione shkatërruese për shkak të përbërësit të tyre shpërthyes të lidhur me gazra ose toksina të afta për të përhapur infektimin. Vitet e fundit ato janë përdorur nga Asadi në Siri, me mbështetjen e Kremlinit.
Shërbimet sekrete amerikane dhe britanike kanë frikë se Putini mund t’i përdorë ato për të shtypur rezistencën ukrainase.
Ato mund të jenë armë kimike – agjentë mbytës si klori, agjentë flluskash që godasin përmes thithjes dhe kontaktit, agjentë nervorë – ose armë biologjike, si antraksi ose karbon.
Armët bërthamore taktike
Si Uashingtoni, ashtu edhe Kievi e kanë bërë të qartë se për momentin nuk ka shenja konkrete të një sulmi bërthamor.
“Për momentin, ne nuk shohim asnjë shenjë në këtë drejtim”, – tha drejtori i CIA-s, William Burns, por “përdorimi i mundshëm i armëve bërthamore nga Putini nuk duhet të merret lehtë”.
Ndryshe nga ato “strategjike” të Luftës së Ftohtë, me të cilat Shtetet e Bashkuara dhe Rusia mund të godasin njëra-tjetrën, duke qëlluar drejtpërdrejt nga territori i tyre dhe që përdoren si parandalues, armët bërthamore taktike kanë një rreze më të shkurtër dhe godasin në distanca më të shkurtra.
Ato janë pajisje më të vogla se ato klasike, me një distancë të kufizuar prej rreth një kilometër e gjysmë, për t’u përdorur në betejë nëse ushtria nuk arrin të fitojë me armë konvencionale.
Rusët kanë rreth 2000 të tilla në depot e tyre, jo gati për përdorim dhe për t’i lëshuar, mund të përdorin dy sisteme: raketat “Kalibr”, 6.2 metra të gjata dhe të gjuajtura nga toka ose deti, të cilat kanë një rreze veprimi prej 1500/2500 kilometra dhe sistemi “Iskander-M”, i cili nis nga toka dhe ka një rreze veprimi prej 400-500 kilometrash.
Ka shembuj të shumtë të armëve bërthamore taktike, ato ndryshojnë shumë në madhësi dhe fuqi: ngarkesa e më të voglit, mund të arrijë një kiloton, ose ekuivalentin e një mijë tonësh TNT, më i madhi edhe në 100 kilotonë.
Efektet ndryshojnë sipas madhësisë dhe vendndodhjes së shpërthimit: ai që vrau 146.000 njerëz në Hiroshima, “Little Boy”, kishte një ngarkesë prej 15 kilotonë.
*Corriere della Sera
