Mustafa Nano një ditë më parë rrëfente një telefonatë që i kishte bërë Lulzim Basha.
“Përpara disa kohësh, pas një shkrimi timit kritik ndaj kryeministrit Edi Rama, më bëri një telefonatë kreu i PD-së Lulzim Basha.
Ishte një telefonatë që nuk e prisja.
Kisha rreth 10 vjet pa ia dëgjuar zërin në telefon.
Dhe nuk kanë qenë 10 vjet dosido. Përkundrazi, kanë qenë 10 vjet të mbushura me ngjarje të mëdha, të rënda, për të cilat një politikan ka plot arsye për të biseduar me një gazetar që për të gjitha këto ngjarje ka patur qëndrimet e veta.
“Është koha të reagojmë përballë kësaj bande; duhet të takohemi; duhet të bëhemi bashkë”, më tha.
Dhe fliste nga pozitat e një njeriu të shqetësuar për fatet e vendit, e një njeriu që në kokë ka vetëm ideale e që nuk është gati të bëjë asnjë kompromis mbi kurrizin e këtyre idealeve.
Ishte pak a shumë ky Bashë që njerëzit shohin në TV, madje edhe në këto ditët e protestës, që është një nga protestat më të gabuara e më budallaqe që është bërë ndonjëherë në Shqipërinë postkomuniste. I ngjan mentorit të vet në këtë pikë.
Sa më shumë e trashin zullumin, aq më shumë shiten si idealistë. Gjë më bezdisëse nuk mund të ketë”, shkruante Nano dje.
Shkrimi ka shqetësuar Çlirim Pekën.
“Nje keshille per Lul Bashen: Telefonatat jane private, por jo me ish- spiunë”, shkruan Çlirimi, që do ta çlirojë Bashën nga armiqtë.
