Kush ishte i ekzekutuari më i fundit në Amerikë, historia e krimit të rëndë, dhe pse Kim Kardashian dhe 500 mijë amerikanë i kërkuan presidentit Trump që të zëvendësonte dënimin e tij me burgim të përjetshëm
Shtetet e Bashkuara ekzekutuan të enjten kriminelin e dënuar Brandon Bernard, 40 vjeç, pavarësisht kundërshtimeve nga disa juristë në gjyqin e tij të cilët kërkuan nga administrata Trump të tregonte mëshirë.
Historia
Vdekja e Bernardit është ekzekutimi i nëntë që kur Prokurori i Përgjithshëm William Barr vazhdoi të zbatonte dënimin federal me vdekje pas një ndërprerje 17-vjeçare në fillim të këtij viti.
Bernard u dënua me vdekje në vitin 2000 së bashku me bashkëpunëtorin Christopher Vialva për vjedhje makinash dhe vrasjen e çiftit Todd dhe Stacie Bagley në një pjesë të largët të bazës ushtarake Fort Hood afër Killeen, Texas.
Vialva rrëmbeu dhe qëlloi çiftin nga një distancë e afërt, ndërsa ishin shtrirë në bagazhin e makinës. Më pas, Bernard i vuri flakën makinës.
Në kohën e krimit, Bernard ishte 18 vjeç dhe Vialva ishte 19 vjeç.
Tre të tjerët të përfshirë në rrëmbim dhe vrasje nuk ishin në moshën ligjore kur ndodhi krimi dhe i shpëtuan dënimit me vdekje. Dy janë liruar tashmë nga burgu.
Pesë juristë nga gjykimi mbështetën kërkesën e Bernardit për falje, duke thënë se avokatët e tij bënë një punë të keqe duke e mbrojtur atë në gjyq, ndërsa ishin dakord që të dy Bernard dhe Vialva ishin fajtorë, por jo që dënoheshin me vdekje.
Gjysmë milioni njerëz nënshkruan peticionin duke i kërkuar Presidentit Donald Trump të zëvendësojë dënimin e tij me burgim të përjetshëm, veçanërisht duke theksuar papjekurinë e tij në kohën e krimit dhe sjelljen e mirë në burg.
“Në 18 vjet e disa muaj, truri i tij nuk kishte mbaruar së zhvilluari”, u lut në mënyrë specifike Kim Kardashian.
Ekzekutimi
Vialva dhe Bernard u dënuan me vdekje nga një gjykatë federale në vitin 2000. I pari mori një injeksion vdekjeprurës në shtator në burgun Terre-Haute dhe i dyti pësoi të njëjtin fat të enjten më mbrëmje pasi Gjykata e Lartë refuzoi një apel përfundimtar.
Bernard është personi më i ri në moshë që ekzekutohet në 70 vjet për një krim që e kreu kur ishte adoleshent. Fjalët e tij të fundit shkuan për familjarët e viktimave, të cilëve u kërkoi ndjesë për dhimbjen që u kishte shkaktuar.
Ndërkaq, familja Bagley falënderoi presidentin amerikan, Donald Trump, dhe qeverinë për ekzekutimin e vendimit.
Pavarësisht nga humbja presidenciale e Donald Trump, të cilën ai nuk pranon ta pranojë, qeveria e tij ka planifikuar katër ekzekutime të tjera deri në 20 janar, megjithëse ka qenë një traditë 131-vjeçare që presidentët në largim të shtyjnë ekzekutimet në pritje të ardhjes së pasardhësve të tyre.
