Taksisti Aldo Vyshka, i cili u mbajt peng për disa orë në një lokal në fshatin Katund i Ri, në Elbasan, ka dëshmuar para policisë lidhur me ngjarjen.
Vyshka tha se dy të rinj i morën me dhunë 2 mijë euro, që ai shprehet se i kishte për shkollën e vajzës.
Taksisti akuzon pronarin e lokalit, Thanas Bejko se e ka mbajtur peng deri në orën 02:00 të mëngjesit.
“2.000€ që kisha me vete, ishin paratë që do paguaja shkollën e vajzës. Më mbajti peng pronari i lokalit, Thanas Bejko, deri në orën 02:00 të mëngjesit”, është shprehur Vyshka.
Pas mesnatës, Vyshka ka mundur të lajmërojë policinë e cila ka arrestuar pronarin e lokalit, shokun e tij, si dhe dy kamerierë të këtij lokali.
“Specialistët për hetimin e krimit në Komisariatin e Policisë Elbasan pas denoncimit të marrë nga një shtetas (taksist), i cili kishte qëndruar për kafe në një lokal në Elbasan dhe aty i kishin vjedhur një shumë eurosh dhe e kishin mbajtur peng për disa orë, menjëherë kanë organizuar punën për zbardhjen e ngjarjes, identifikimin dhe kapjen e autorëve.
Falë veprimeve të shpejta kanë bërë të mundur zbardhjen e ngjarjes, identifikimin dhe arrestimin e autorëve, konkretisht shtetasit: Th. B., 33 vjeç dhe E.S., 42 vjeç, banues në Elbasan (përgjegjësi i lokalit dhe shoku i tij).
Arrestimi i tyre u bë pasi në ambientet e një lokali në fshatin Katund i Ri, Elbasan, këta shtetas në bashkëpunim me njëri- tjetrin i kanë vjedhur me dhunë një shumë prej 2000 eurosh dhe e kanë mbajtur peng për disa orë shtetasin A.V., i cili punon taksit dhe kishte ndaluar aty për të pushuar. Këta shtetas kur kanë parë që taksisti kishte një shumë eurosh me vete ja kanë vjedhur me dhunë dhe e kanë mbajtur për disa orë që të mos tregonte.
Gjithashtu po në vijim të veprimeve hetimore të kryera nga specialistët për hetimin e krimit në Komisariatin e Policisë Elbasan, u arrestuan në flagrancë për veprat penale “Veprime që pengojnë zbulimin e së vërtetës” dhe “Deklaratat e rreme përpara oficerit të policisë gjyqësor”, shtetasit E. I., 20 vjeç dhe E.Gj., 20 vjeç, (kamarierët e lokalit), të dy banues në fshatin Katund i Ri, Elbasan.
Materialet i kaluan Prokurorisë pranë Gjykatës së Shkallës Parë Elbasan, për veprime të mëtejshme.”, thuhet në njoftimin e policisë.
