Franca ka akuzuar Mbretërinë e Bashkuar për shantazh lidhur me eksportin e vaksinave, mes tensioneve të vazhdueshme mbi zinxhirët e furnizimit, raporton BBC.
Ministri i Jashtëm Jean-Yves Le Drian u pyet nëse BE ishte “mashtruar”, ndërsa Mbretëria e Bashkuar ka siguruar miliona doza.
“Ne duhet të ndërtojmë një marrëdhënie bashkëpunimi, por jo në këtë mënyrë”, i tha ai radios France Info.
Franca ka bërë thirrje që BE të zbatojë kontrolle më të ashpra të eksportit.
Shpërndarja e vaksinave ka filluar e ngadaltë në të gjithë bllokun dhe BE ka fajësuar kompanitë farmaceutike kryesisht AstraZeneca-n për mosdhënien e dozave të premtuara, ndërkohë që AstraZeneca ka mohuar se nuk po respekton kontratën e saj.
BE pret të marrë rreth 30 milionë doza AstraZeneca deri në fund të marsit, më pak se një e treta e asaj që shpresonte. Procesi i vaksinimit në Britani ka qenë deri më tani më i suksesshëm se në 27 vendet anëtare të BE.
Të enjten, pas një samiti virtual ku udhëheqësit e BE diskutuan furnizimet e vaksinave, Presidentja e Komisionit Evropian Ursula von der Leyen tha se blloku ishte “rajoni që eksporton shumicën e vaksinave në të gjithë botën”.
Ajo gjithashtu tha që AstraZeneca duhet të “sjellë” dërgesat e saj në BE përpara se të eksportojë doza diku tjetër.
EMA i hap dritën jeshile fabrikës së Pfizer-Biontech në Gjermani
Agjencia Evropiane e Barnave (EMA) ka dhënë certifikimin për prodhimin e vaksinës së BioNTech-Pfizer në Marburg. Fabrika gjermane është thirrur të bashkëpunojë intensivisht në prodhimin e dy miliardë dozave të vaksinës anti-Covid deri në vitin 2021.
“BioNtech Marburg është një nga vendet më të mëdha të prodhimit të vaksinave mRNA në Evropë dhe botë me një kapacitet prodhimi deri në një miliard doza“, lexohet në një shënim të Pfizer.
“BioNTech parashikon të prodhojë 250 milionë doza të vaksinës në gjysmën e parë të vitit 2021, me dozat e para të prodhuara në uzinën Marburg që do të dorëzohen në gjysmën e dytë të Prillit”, thuhet në deklaratë.
Nga ana e saj presidentja e Komisionit Evropian Ursula von der Leyen tha se rritja e kapacitetit të prodhimit të vaksinave në Evropë është përparësi e BE-së.
“Rritja e kapacitetit të prodhimit të vaksinave në Evropë është përparësia jonë. Unë mirëpres vendimin e EMA për të miratuar faqen Halix në Holandë për AstraZeneca dhe Marburg në Gjermani për BioNTech-Pfizer. Më shumë site prodhimi do të thotë qasje më e shpejtë në vaksinat për qytetarët evropianë”, shkroi Von der Leyen në Twitter.
