Robinho i ka mohuar edhe një herë tjetër akuzat që janë ngritur ndaj tij. Sulmuesi brazilian, i cili është dënuar në Itali me 9 vite burg për dhunë seksuale, tha se “krimi” i tij i vetëm është fakti që nuk u tregua besnik ndaj bashkëshortes së tij.
Në një intervistë për “UOL Esporte”, ish-lojtari i Real Madrid, Manchester City dhe Milan tha: “Gabimi i vetëm ishte se nuk i qëndrova besnik gruas. Nuk kam përdhunuar, nuk kam abuzuar me askënd”.
Intervista e Robinho vjen një ditë pasi Santos i prishi kontratën e saponënshkruar për shkak të presionit nga shoqata të ndryshme, të cilat thanë se ishte e papranueshme të blihej një futbollist i dënuar nga drejtësia italiane. Robinho dhe një miku i tij u dënuan nga Gjykata e Milanos me akuzën e përdhunimit kolektiv të një shqiptareje në vitin 2013, gjatë një feste në disko. Braziliani pranoi në intervistë se ka pasur kontakte intime me shqiptaren, por jo marrëdhënie seksuale.
“Ajo ishte dakord që të prekeshim dhe vetëm kaq ndodhi. Unë ika pastaj në shtëpi, ajo qëndroi në disko me miqtë e saj. Shokët më thanë të nesërmen se me dakordësinë e saj kishin kryer marrëdhënie seksuale me të. Më pas, kishin shkuar në një tjetër disko. Nuk e di çfarë kanë bërë ata sepse nuk mund të flas për ta. Unë di se çfarë kam bërë vetë me vajzën dhe ato që kam bërë kanë qenë me dëshirën e saj”, tha Robinho.
Por mediat braziliane kanë botuar transkriptimet telefonike, që drejtësia italiane përdori për të dënuar Robinhon për dhunë seksuale. Në një nga ato biseda, muzikanti Jairo Chagas, i cili performoi në vendin e ngjarjes natën e përdhunimit në grup, i shprehu Robinhos shqetësimin e tij në lidhje me ecurinë e hetimit, por lojtari brazilian i është përgjigjur: “Unë po qesh dhe nuk më intereson fare, sepse ajo ishte plotësisht e dehur, as nuk e di se çfarë ka ndodhur”.
Në një tjetër përgjim, Robinho fliste me mikun e tij se si të jepnin të njëjtin variant në gjykatë, pasi sipas tyre në diskotekë nuk kishte kamera sigurie.
