Kryepeshkopi i Kishës Ortodokse Anastas Janullatos ka dhënë një intervistë për televizioni grek SKAI në prag të Krishtlindjeve.
Ai ka folur për harmoninë duke theksuar se liria fetare është e plotë dhe se Kushtetuta e Shqipërisë është ndoshta me e mira në botë.
Janullatos u ndal edhe në shqetësimin e madh që ka për minoritetin grek në Shqipëri.
“Problemi më i madh i grekëve në Shqipëri është që fshatrat janë boshatisur, pasi ata janë larguar. Çështja është se ata që kanë lindur dhe rritur në këto fshatra dhe duhet të zhvillojnë jetën e tyre atje. Të ikin nga ato vende dhe të fillojnë të bërtasin që “të tjerët na urrejnë” është një zgjidhje e lehtë, por në fakt nuk është kjo e duhura”, tha Janullatos.
Në lidhje me marrëdhënien e tij me Kryeministrin Rama kryepeshkopi theksoi se ka komunikim të vazhdueshëm me të.
Për disa gjëra nuk është dakord, por i rëndësishëm sipas kryepeshkopit është dialogu.
Në lidhje me Himarën dhe çështjen e pronave të minoritetit grek ai nënvijëzon se është një çështje e përgjithshme në të gjithë Shqipërinë, jo vetëm e Himarës, raporton Vizion Plus.
“Është një çështje e përgjithshme, jo vetëm në Himarë nuk janë kthyer pasuritë. Madje as neve për kishën nuk na janë kthyer shumë prona. Pavarësisht se kemi marrëveshje zyrtare me shtetin nuk janë dhënë ende, ka vonesa. Kthimi i pronave në Shqipëri është procedurë nëpër komisione e gjykata. Çështjet e pronësisë janë të ngatërruara. Himara nuk është një çështje më vete. Shteti ka të drejtë të bëjë ndërhyrje të caktuara, por duhet t’u jepet prona e pasuria atyre që u takon”, shtoi Janullatos.
I pyetur nga gazetari për raportet mes Tiranës e Athinës, kreu i Kishës Ortodokse Anastas Janullatos jep këtë mesazh.
“Greqia mbetet gjithnjë fqinji. Fqinjët gjenden gjithmonë në momente të vështira. Njerëzit duan që këto marrëdhënie të jenë të përforcuara dhe të sinqerta. Të mos biem viktima të tensioneve, por të ngremë ura”, theksoi kryepeshkopi.
Janullatos foli dhe për krizën greke dhe për autokritikën që duhet të bëjnë greket, si dhe për globalizmin e islamin.
Sipas tij duhet të shihet e vërteta siç është.
“Në Shqipëri njerëzit e thjeshtë janë njerëzit e drejtësisë dhe të vërtetës”, përfundon kryepeshkopi.
