Gjyqtari i Gjykatës së Tiranës Gerd Hoxha do jetë pjesë e sistemit të drejtësisë edhe pse ndërkombëtarët që e monitorjnë vetingun e donin jashtë.
Vendimi i Kolegjit të Posaçëm të Apelimit nuk është pritur mirë nga vëzhguesi i Operacionit Ndërkombëtar të Monitorimit.
Theo Jacobs ishte i ashpër me trupën gjyqësore kur tha se ky vendim ishte hije për imazhin e tyre.
“Në emër të vëzhguesve ndërkombëtarë, do të doja të theksoja se ne nuk biem dakord totalisht me këtë vendim, jo vetëm për përmbajtjen por gjithashtu dhe për procesin e vendimmarrjes. Jam thellësisht i keqardhur që ky vendim po hedh hije mbi imazhin e fortë që kjo dhomë ishte e aftë të ndërtonte mbi vendime të vështira dhe kurajoze. Drejtësia është diçka që shërbehet kur vendimi merret mbi fakte, jo kur faktet rregullohen sipas rezultatit të dëshiruar. Reforma në drejtësi, procesi i vetingut, kjo dhomë speciale dhe qytetarët shqiptarë meritojnë më shumë dhe më mirë se ky vendim”, tha Jacobs.
KPA konfirmoi vendimin e shkallës së parë, por me një nga anëtarët kundër. Sipas komisioneres Brunilda Bekteshit, Hoxha nuk justifikonte një hua prej 25 mijë eurosh të marrë nga ish-bashkëshortja e tij Elbana Lluri.
Kjo ishte arsyeja pse ONM kërkoi ankimin e këtij vendimi dhe shkarkimin e gjyqtarit.
Por gjetjet nuk kanë bindur KPA për Hoxhën, ndërsa ish-bashkëshorten e tij e kanë shkarkuar nga detyra e gjyqtares së Apelit Tiranë.
