Kolegji i Posaçëm i Apelimit rikthen për herë të parë për rivlerësim në Komisionin e Pavarur të Kualifikimit një magjistrat të shkarkuar nga detyra. Përmes vendimit të së martës shkalla e dytë e vetingut riktheu në shkallën e parë prokuroren e Apelit të Korçës, Irma Balli.
Rihetimi
Kolegji i Posaçëm i Apelimit ka vendosur që të rikthejë dosjen e Prokurores së Apelit Korçë, Irma Balli, për rivlerësim në shkallë të parë.
Për herë të parë shkalla e dytë e Vetting-ut ka marrë një vendim të tillë, ku vendosi se Komisioni i Pavarur i Kualifikimit duhet që të rihetojë prokuroren Balli edhe për aftësitë profesionale dhe pastërtinë e figurës.
Për këto të dy kritere magjistratja nuk kishte kaluar filtrat e KPK-së. Po ashtu KPA ka konstatuar se prokurorja ka burime të ligjshme për të justifikuar pasurinë e saj, ndryshe nga sa ka pretenduar shkalla e parë e Vetting-ut.
Irma Balli u shkarkua në 19 shkurt të 2019 nga KPK për shkak se u konstatuan probleme me burimin e krijimit të pasurisë. KPK e mbylli hetimit vetëm për kriterin e pasurisë pa i hetuar dy kriteret e tjera. Inspektorati i Lartë i Deklarimit dhe Kontrollit të Pasurive dhe Konfliktit të Interesit, në raportin e dorëzuar në KPK theksonte se Balli kishte kryer deklarim të rremë dhe të pasaktë të pasurisë.
Ishte vetë prokurorja e cila ankimoi në KPA vendimin e shkallës së parë. Pas vendimit që u morë të martën Komisioni i Pavarur i Kualifikimit duhet që të fillojë hetim administrativ për Ballin dhe të caktojë datën e seancës dëgjimore.
